Asenok telongjem

Nütsüng nübo aika kümaka longjema melira, bilemyonga, mapa tajung tuluka meinyaktettsü aser tangaria mezüngmeshitsü, ibayongji kong lidir liaka asenok longjema alitsü meranger. Nisunger shisatsü nung tajung ka lir, ibaji tangar den putepa aser longjema linür, iba jagi asenok alidak tesem ajaklen telok balala tenteta longjema alitsü merangba angutsü. Atangji, asenok longjema alitsü atema lokti tentetbaji tangar anema inyaktsüba masü saka akok tashi tangar asoshi tajung inyaktsü atema longjemer. Iba tangatetba nung nükjidong tajung yur asenok lokti tentet telongjem aikati mapa tajung inyakba angashir. Ajisüaka, asenok asoshi timtem kaji asenok adenba lokti onsara, anungji aiben nübo magütsütetter aser rongsena imlaba ama metenlatetter. Aji oda, asenok longjema linüaka melitetba timtem kaji lokti telongjem tentet onsaraba agi asütsüa akok. Nisung shia pei yimtsüng telongjem nung dena lir aser ano iba madakji tzükong telongjem  lir aser külenang ano kin telongjem lir. Ano, iba dakji alaka kin kidong aser Naga nunger telongjem tentet aika nung adentsüsa adoker. Atangji, yimtsüng nungi tzükong aser tzükong nungi pei kin telongjem aser pei kin telongjem nungi  Naga kin telongjem tentet balala tenteta aliba jagi aiben mapa inyakyim nung melamelaa ayongteptetter aser khuret lemsatepa abener. Ajisüaka, jungjunga bilemdangra, kasa nübortem rongnung lokti telongjem tentet onsara aliba agia aiben tebenja adoker aser pei lima aser nübortem asoshi tajung bilema inyakdi asüyonga aiben kenbang obang memedemtetter. Ibayongji, aiben Ao kin telongjem nunga nübortem ajak longjemer nübortem asoshi inyakdi ta bangjemyonga ozü tzükongbo madentsü, ozü yimerbo madentsü aser onokbo madentsü ta asüba timtem adoker. Atangji, asenok yimten aser lokti inyakyim nung shingaia shinga kangshia shilem agidaktsütsü mesüra tendaktsütsü makok saka lokti yimya agi ajaki mulungba nung telemtetba magitetra teimbai mulungba nung telemtetba agir, anungji kari memulungyongbo teimbai mulungba nung anidaktsüsa akümer. Ibaji mapa tasak saka democracy takok ngudaktsütsü asoshi senso kati tenlatsübaji peii memulungaka teimbai mulungba nung agizüka anidaktsübaji asütsü. Tanü ama asen lima yimten aser loktiliba nung tebilemtsü aika ataloker, anungji item tebilemtsütemji lokti telongjemi reprangtsüsa akümer. Iba ama mapang nung lokti tentet nung lenirtem dak tangatetba tajung melira pei lokti telongjem tenüng nung nübortem akoksatsüsa dang inyaktettsü. Aiben lokti telongjem tenüng nung tang aser tarutsü asoshi mapa tajung ka inyaktsü apusodang, kari pei kija ajangzüktsü bilemer, kari pei adenba political party indang bilemer, kari pei yimer aser tzükong indang bilemer ta asüdang, telongjembo tenteta ayu saka longjemer tashi itta külem ajangzüktsü asoshi meinyaktetter. Tanü asenok loktiliba nung iba timtemji aiben ajurudagi. Iba ama timtem reprangtetba agi, telongjem alitsüba ya junger saka telongjem tentet karbo anenadok nunga koma ta bilemer. Ibayongji, taoba hopta nung asenoki Aor rongnung tzükong telongjem tentet ya mali nunga koma süla (?) ta asüba onük nung bilemdangogo aser telangzürtemia maliba-ang tajungba asütsü ta asüba tangatetba lemsatepogo. Atangji, joko tzükong mungdang tentet tentetter küma aika arur asünungji mali küma loksatsüjia tasak asütsü saka asenoki pei tzükong dang nungibo Ao kin telongjem tenüngdakba aser tuluba ama züngshia inyaktsüsa ajungshitepdaktsüner. Tatishitsü tajung kaji, Dimapur nungbo tsüraburtem tenteta liaka kaketshirtembo tzükong kaketshir telongjembo tenteta mali, iba jagi Aor kaketshir aser lanurtem rongnung ozü tzükong, nür tzükong ta asüba shisatsü melii asenok ajak Aor ta asüba tangatetba nung longjemdaktsür. Asenoka parnok dangji ajizüaka, asenok alidakbo ozü yimer, nür yimer, ozü tzükong, nür tzükong ta tebilema mebilemi asenok Aor aser asenok Telongjem ta jembia mapa tajung tulu inyaktsü tenzükdi.