Asenok vote agi asenok tarutsü tia yanglur: K.Therieh

Dimapur, April 21 (TYO): Nagaland nung electoral roll yanglushia merüktettsü asoshi Chief Electoral Officer-i kanga meranga inyakba asoshi pelaba metetdaktsüba osang ka nung, asenok ajaki “kü meyong vote ya kü tarutsü tia, nü meyong vote ji nü tarutsü tia aser asenok meyong vote ya asenok meyong tarutsü tia,” ta angatetdaktsüner, ta Nagaland Pradesh Congress Committee (NPCC) nung Tir, Wb.K.Therie-i metetdaktsüogo.
Paisa ashiba agi, nisung maliba tenüng  nung vote enoktsüba agi asenok tia aser tarutsü anogotem raksar aser tangar tenüng nung vote agütsürtemji asenok tarutsü tia raksatsürtem lir.
Nisung ka taküm nung tarutsü teimla alibajisa tuluba, teimla melira taküm alibaji kecha tetezü mali ka akümer, anungji election mapang nung shinga nema asenok tarutsü teimla raksadaktsütsüsa meinyaktsüla, ta NPCC tirisa metetdaktsü.
Election mapang vote melen sen meshia agiba agi pei tarutsü tia ayoker, ibaji metetsümonga menaba tai asütsü, anungji tekümteta samatsü. Aji oda, tesem aika nung pei tenüng electoral roll nung enoka alibaji nisung aser Tsüngrem tsüngdanga tai aser tasoba küm agi matong ser vote agütsübajia tai aser ozüng raksaba mapa ka lir, ta paisa ashi.
Electoral roll nung tenüng züluoka inyakertem BLO aser BLA-temi kanga nendaka ochishia inyaktsüla aser nütsüng yongsük aser Arogo züngsemtem rongnung electoral roll nung alibaji 65% dak tali süra itemji ano reprangshitsüla, ta NPCC tirisa takhangba ka agütsü.
Aji oda, election mapang polling officer-temi kecha tsütsüa tejak meshitsüi temzüng ozüng nung aliba ama shitak inyaktsüla, ta paisa metetdaktsü.