Asenokbo memeimer asü ?

Kerala nung atalokba tzümetsüng lendong denbo medemdangtsü makok saka Nagaland nunga asenok yaribo tesem aika nung tzümetsüng aser anentsü lendong agi kanga timtemogo. Item lendong timtem majurur aser majangshirtemibo taküm küm Nagaland nung atalokba lendongtem indangji kecha balaka shishia bilema malitsüa akok saka asen lima nung akhidang ajuruba alima lendongtsüdongtem den medemdangra, taküm küm ajuruba lendong aser timtemtem yasa tuluba ajurua nisungtem kanga timtemogo. Nagaland tesem aika nung tanü boksünga mangu timtemba nübortem aika lir asünungji, tzümetsüng aser anentsü lendong agi jangotsü abenba gari anogo ishika mesenzütet akümba ajanga Nagaland tesem kar nungbo ayawara agi tonger timtema liasü. Ibayongjiang, state government-i anepalua tesem  kar nungbo tayimtsü nung dena jangotsü bener oa tongtsüba asenoki nguogo. Iba denji ano Nagaland nung tatar yimsüsürtemi ita ka sen sarutepa teyari agütsüba asenoki angashiogo. Iba ama timtem mapang yariteptsü asoshi center nungia kilonser Kiren Rijiju aruagi, chief minister tena külemi tayimtsü nung mener anünglen nungi Nagaland nung tzümetsüng aser anentsü lendong ajurua timtemba tesemtem repranga senzüba asenoki metetogo. Ajisüaka, Kiren Rejiju arur asenok nübortem timtem ajuruba tensa tia repranger aoba sülen pa ajanga center government nungi teyari yokba tanü tashi mangashir. Ibai asenok asoshi tebilemdangtsü tuluka lir. Aji oda, Kiren Rejiju arur Nagaland nung nübortem timtem ajuruba repranger aoba dak alaka teyari kecha bener meyokba tetezüji kechi (?) ta tasüngdangba tuluka arur. Ibai tejashitsüka aser ano külenbo taaktsüka lir. India government-i asenok memeimer asü mesüra asenok dak tamang makar ? Nagaland nung tzümetsüng agi nisung kar asübajibo mesüra alu aser kiojen kar rakasaba atemajibo teyari agütsü malang asü koda (?) ta center government dang asüngdangtsübaji kanga nüngdaker. Tang ama nübortem timtem lendong ajuruba mapang teyari agütsübaji sen jenjangji dang masü saka aria bilema temeim sayuba mapaji tuluba lir. Kerala government-i teyari sen crore meyirijang ana meshi saka crore 600 dang agütsü. Ajisüaka, ibajia teyari tuluka asütsü aser center government-i meimba temaitsü sayuba kuli angur. Ajisüaka, Nagaland nung timtemertembo memeimer asü ? Mesüra yimsüsür aser ketdangsertem dang temulung malemer asü koda ? Ibaibo teyari manguji kecha masü ta ser toktsütsüla mapa ka masü. Atangji, kechiba onok nem teyari magütsür ta longkak aittsüa menüngdaker, ajisüaka center government-i asenok meimer asü memeimer aser temulung alemer asü malemer ta asenoksasa asenok dang asüngdanga telangzüba bushitsüla. Aiben asenoki Nagaland governor-i dena Nagaland nung yimsüsür aser ketdangsertem dak temulung melemi jembiba asenoki angashir. Joko, Nagaland nungbo government inyakyim kecha nunga ochishia inyakerbo mali ama jembir aser angur. Ashiko, iba jagi center govermnent nung alirtemia Nagaland nem teyari agütsüyonga timtemertem ketbosa matongtsü südi ta temulung melemi bilemer südi. Mapa ajak nung nisung ajak asoshi temulunglemtetba ya kanga tongtibang lir. Temulung lemtetra tonga aruagi mereprangdangyonga tangashi dang angashi nung mulungsua yariteptsü. Ajisüaka, temulung melemtetra tang amaji arur reprangdanger aoyonga tiyazü sayu ama dang bilemtsü aser agütsüyonga shitak mamshitsü amai dangsa bilemtsü. Tanü asenoki asen tia ya bilemdangra, asenok ya sen makaba agi timtemer masü saka ochi makaba agi timatemer. Asenok asoshi tang rongdak nüngdak inyaktsübaji tulur tilar na pronglai inyakba maparen ajak nung tangari temulung lemtettsüsa inyak tenzüktsübaji asütsü. Asenoki jungjunga bilemdangra, tangari asenok dak temulung melemtettsüsa asenok aliba jenjang dang nungi teküpboktiba jenjangbo iba lima nungbo malitsü.