Asenokbo Merokmi Remseper südi

– T. Nukshi Yaden, Tuli.

Asenok ajaki metet merokmi ya tetepsüper melira taseper ama süli ano tesem ka nungi kaoteta rongyunga oli ta aser. Ano külenbo teremseper liaka tesem kelen nungi oteta meroyonga oli ta asür.
Tanü Naga lima tia ya reprangtangra, iba küm 5 tsüngda ya yamaji merok mi ama tanener ama süli ano tip kelen nungi rongronga tenzüka tip matem tenzükli ta nübur kanga makmaka shisapuluteper. Aji oda, tang parnok linük kutdangsüa anitsü asoshi asenoki shimer yoker tem rongnung kechi agi mepetmesü adoker parnok tsüngda lemdanger anogo ishika koda pentetdir ta alidang, koba südir süang Governmentbo lemteter aotsüsa tensa agi bener arutsüogo, aser aji oda asenok nüburtemia merokmi remsepa aoba angu ama tensa to tazüokba kati arudar ta yimlaa mulung anisüngzüka bilemer.
Iba ama tensa ka nung alidang ano tesem külen nungi ano kari mi senoktsü ama asenok nüburtem nungi külen mesüra külen aija mesüra metenja jembia osang kakettem nung prokshia aji oda ano meimlaba tensa kar asenoki ajurutsü aser aji asenoki bener aruba timtim ajanga asenok okronger asütsü ta metetdi. Iba ya yimya ka ama parnok Political Party sasep nung anogoshi mangatetep tapu jenti adoka puluteptsü akok aser aji oda ataloker.
Iba ama tensa ka nung asenok (Civil Societies) lokti tentet balala jenti alinung, metendangi mesüra memeteti asenoki ola madok tajungba ta bilema, mesüra tetsüngdai ia tim ken O tashitsü lira yimjung yanglur ka ama tangatettep tajung kati arutsü lenmang bushia shilem agitsü reprangtetra ajibo tim teinyaktsü ka inyaker asütsü.
Tongtipangsa. asenok Aoer tem Naga nunger ajaki temetet, aser lennir kin ta jembir aser asenok dak nungi tajung inyaktsü aika imlar, saka asenoki aji oda meliteter ama bilemer. Asenok Aoer Dimapur,Kohima,Mokokchung, jilatem nung IAS officer-temi anir Director, Secretary, Dr, Eng. retired tem jenti sentepa aliba yemtitem kong asenok Aoer Telongjem tentet tajung inyaktsü nükla nung tenteta lir, nenok dak nungi tanga kini dang masü saka asenok Aoer tesem balala aser yimdaklirtemi nenok nungi alima yanglua tejakleni anitsü teimla tulu lir aser aji oda nenoki tajung aika inyakba nguagi. Saka tanü ama tensa ka nung tesüneptsü ola tajung adoktsü melen koda asü tangar kin tila teri ka nem asenoki arishidaktsütsüsa ola adokba angashia kanga nemjena bilemer. Kechiaser iba lima nung asena asen kija koda melitet aser tangara yamaji par kija melitet, kati ka dak tangeteba alinung dang sünepa liteter. Iba ama tensa ka nung Aoeria kechi ashir ta tajung ka yimlaa shinga ola madoki alidang, asenoki tangar kar mulung yirutsüsa ajemoktsüra, ajibo shiranger nem tashidak ten mapetba mozü agütsü ama asütsü südi aser asenokji mi remseper masü mi asener ama asütsü.
Anungji asenok Aoer tem tangari asenok dak tajung imlaba ama lenir aser lokti nung tantsü tambo ka ama timi tesüneptsür ka ama lidi ta lemsateper.