Asenoki agütsü tenzükdi

Ozü yimeri ozü atema kechi tajung inyak ? Government-i onok nem kechi teyari agütsür ? Lokti tentet paikaya tenteta aliba yagi kü nema kechi tajung bener arutsür ? Iba amai asenok chiyongtsüba nungi jajatsüba aser yimdong nung jana okdoktsüba tashi asenoki government dak mesüra tangar dak imlar. Ibaji asenok asoshi tashidak kümogo. Iba jagi asenok mainer kechiyong mapa tajungbo ajak tangari inyaktsü imlaba agi asenok marakzüker. Iba ama mapang ka nung Dimapur nung Ao Kaketshir Telongjemi gari lenmang tezülen tetsüng agi jajaba yimkong lenmang süklep meyirijang ka shi talang yanglutsür külenang iba dak mataka aliba longru jara nung tetezü aketba noksa tapu aika yanglua anepalutsü tenzükbaji ajak asoshi ajizüka inyaktsüba mapang tajung ka asütsü. Iba jagi tanü lanurtem mulungjangi tangatetba tajung ka aruogo ta reprangtetter. Joko, government-i meinyaktsüra timtema asüyonga odang jajatsü mesüra alitsü ta masü government-i meinyaktsüra onoki inyaktsü ta asüba tangatetba aser temulungtetba ka lanurtem mulungjangi aruogo. Dimapur nung Ao Kaketshirtemi tetsüng lenmang topur junga yangluja anepaluba ya parnok Hon Jubilee amongba tenüng nung Dimapur yimti asoshi inyaktsür. Ano, parnokisa Hotel Saramati anasa nisungtem anisüngzüka kazüdak aser tzü tajung ajemdak Public Park cum Free Drinking Water Booth ka yanglutsüdagi. Aiben asenoki Jubilee amongba tenüng nung asen lima mesüra asen yimti asoshi kechi inyaktsütsü ta masü saka asenok agitsü aser asenok ajangzüktsü asoshi kechi inyaktsü ta bilema inyaker. Ibayongji, asen aliba yimti aser tesembo tesembatsüka küma lir aser asenok nübortembo sensak tia nung okrongteper saka asenoki Jubilee tenüng nung asenok agitsü ki-ang ka yanglutsü mulungtetter. Atangji, ajia junger saka kodang asenok kija aser lokti aser ano arogo denai asen lima aser nübortem ajungtsü mebilemi asen-asen kija ajungtsü bilema inyakdir, asenbo tebok süng alitsüa akok aser asükwa nunga lemlema mejangtsüa akok, saka asen limabo teshinem agi asüngtsü aser aika asüktemtsü. Asenok kija aser loktibo takar saka asenok lishi mélanga aser auyi ponga senzür ta asübaji asenoki yimkong ajungtsü mebilemba nungi adoker. Joko, government-i mesüra tangari kechi agütsür ta masü saka asenokia asen lima asoshi kechi agütsür ta bilema inyaktsüla. Asenoki tajung tuluka magütsütettsüa akok saka asenoki asen alidak langka tajung tilakabosa inyaktettsü. Aji oda, kodang asenoki agütsü tenzükdir, idangjiang asenoki government nung alirtem azüoktettsü. Tang yabo asenoki asen lima ajungtsü asoshi kecha magütsür saka asen kija ajungtsü atemabo government nungi teyari aika aginür. Ibayongji government nung alirtemjiang nübortem tenzüker asütsüba agi nübortemang government lar akümer. Government nung alirtemi meshitak inyakba asenoki meteta lir saka nübortemi iba anemaji ola madoktetter, kechiyong kilir-a masü alari kibur anema ola adoktsübaji tamakoktsü. Joko, asenok ya iba ama alar jenjang nung malitsüla. Alaribo tangar nem kecha magütsür saka tangar nungi angutsüba dang imlar. Government-i kecha meinyaktsüba agi asenok chiyongtsü maka, abensüoshi malitet aser pei senzütsüba lenmang dena meyanglutet alar kolok dener alitsüba purtemji asenok masütsüla. Tanishirji tongtibang menden ka nung amenba agi masü saka pei lima aser nübortem ajungtsü asoshi mapa agi inyakbajiang tanishir lir. Asenok alar asütsü asoshi masü saka kibur küma tanishir asütsü Tsüngremibo iba limai yoka lir. Iba nükjidongji tongtettsü asoshi asenok tangar dak dang metaloka malitsüla, meshimetsütsü mebilemtsüla saka meranga inyaker asenok shisatsü, nübo aser rongsen tenlaba agi asen lima aser nübortem anisüngzükdaktsütsü asoshi agütsü tenzüktsüla. Ibai meshimetsüba putu masü saka agütsüba putu lir, kechiyong shisatsü renloker aser alima nung rongsen jaa atur.