Asenoki bener aruba timtem

Kohima aser Dimapur len taoba hopta anogo asem nü tashi tzünglu tilala süaka maneni aruba ajanga Dimapur nungbo kiyong aika tzü agi atsüngbanger kibong aika timtem takoksa jenti ajuruogo. Atangji, Dimapur ya lenden lima asünungji tzünglu kena manen mapang tatsüka danga arura motzü taodak maka aiben tzü agi tesem aika atsüngbanger aser nisungtem timatemer, ajisüaka tan ajuruba timtem takoksa yasa tuluba amaika atalokogo. Atangji, asen lima nung atalokba tzümetsüng lendong ya tsümalen atalokba denbo medemdangtsüla masü, kechiyong tsümalenbo tzüngluruwa aru shia tzümetsüng agi kiojen aser alu raksatsüba aser nisung  aser shiruru arakseta asüba indang osang kanga angashir. Ajisüaka, asen lima nungbo tzümetsüng aruaka, tsümalen atalokba timtem tetkajibo mataloker. Itemji kodang asenoki jungjunga bilemdangdir, asen lima nung tzümetsüng lendong atalokba yabo asenoksasa asenoki jaokba lendong amai dang lir. Lenden lima asüyonga Dimapur yabo motzü yimzüka aodak kanga junga lir. Ajisüaka, asenoki asen alidak tzü matsüngdaktsüi ayongayonga yimzüka aotsüsa inyaktsüba mapatem nung süoki ia mebilemer. Yimti yimdong nung government lenmang yanglurtemi kilentsü yanglua toktsür saka asenoki kilentsüji anogo shi merükteta ayutsü melen, kima aser kilong nung bendenba janaona ajak kilentsü nungji enoka toktsür. Atangji, kima yimdong merükmejuba aser kilentsü junga ayuba maparen nung town nung alirtem dang nungibo yimtaklirtem kanga agia tajungba. Tanü Nagaland nung town-tem o yimtsüngtem na merükmejuba tsütsü medemdangra, kanga agia yimtsüngtem temerükba aser tajungba angutsü. Yimtaklirtemibo pei kima yimdong dang masü saka alu lenmang dena mapang mapang shia apir aser süng long agi kilentsü nokdanga aliba ngura, peisasa itemji jungjunga lapoka toktsür. Iba awashi denji town nung alirtem awashi medemdangra, taaktsüka, town nung alirtem aikati pei ki kilong nung okdenba anakona ajak seper oagi tangar kima yutsütsü mesüra kilentsü nung enoka yutsütsü. Town nung alirtem aika ali nung kanga morumoruba agi, akhidang nungi motzü yimokba ayongnutem onpanger, iba manungji ki yangluba angutsü. Ali nung morumoruba agi, pei ki ajanga motzü yimzüka alutsü asoshi kilentzü dena melapoknüba nisung aika lir. Iba ama tekuro aser tangatetba agi anünga aliba agi, majurutsüla alima lendong ajurur. Dimapur meketa ayong peria dang lir aser tzünglu hopta junga aruyonga item ayongtem nungji sademsadema yimoktsüba ser nung asenoki tzü lenmang ajak nokdanga ki yangluba agi tzü aodak maka asenok alidak atsüngdener. Atangji, yimya agi nisung yabo morumoru aser pei ajungtsü dang bilemer, anungji pei ajangzüktsü merangba mapatem agi lokti timmetemdaktsütsü atema yimteni dang yimkümba anogo nungi mapang ajak nung pei alidak temzüng ozüng lateta inyaker. Kasaji town-tem nunga yimkong ajungtsü atema yimteni sentong atonga inyaktsüba ser nung, yimtenia kecha balaka yimti ajungtsü aser alima lendong nungi kümzüka ayutsü asoshi temulung agüja inyakba mangur. Tangbo tsünglu terara anogo ishika nanaba agi tsümetsüng tera adokba timtem indang jembir, saka ghonda ka maneni tsünglu tululu arunungbo asenok agi matitsü. Ibaji dang masü saka asenoki yimti nung kisüjensüba ya reprangdangra, tanga lima nung anokba ama menoknok teraka sashia anok nungbo süngdang agi yangluba ki tera anokshitsü nung lao ama, asenok kiojentem yabo laodoktsü. Idangji, menoknok agi masü saka kiojen chirepba agi asüama lendong tulu ataloktsü. Asenok shiba südir süang, alima nung lokti nung alir, anungji asen kija ajungtsü mebilemi asen aliba lima, yimti, kiyong aser temeket topur junga ayutsü aser alima lendong nungi akok tashi kümzüka alitsüsa yimkong meimba aser tarutsü indang bilema inyakba shisatsü aser tangatetba ajak dak alitsüla.