Asenoki inyaktsüba mapa

Nagaland nung tsümartem paikaya aliba ya asenok mapa inyaktsürtem lir. Parnok teimbaka kiojen yangluba mapa nung inyaker, kar alu mapa nung, kar shishilembartem aser kar Dimapur nung autorickshaw aser taxi gari anishirtem lir. Parnok ajak ya anogo shia anepdang nungi nikongdang tashi kanga meranga inyaker aser asenok ket nung akaba sen ajak parnok nem agütsür. Khen ashitsübo, asenok ajak ya chuba aser chubatsürtem amato lir, kechiyong asenokbo ayongayonga alitsü aser mapa ajak tangar nem inyakdaktsütsü. Ibayongji, tsümartemi asenok ajak dang sahib aser miimsahib ta ajar. Ibaji kanga tanganütsüka saka küm ishika tsüngda sahib o miimsahib na to par kidang ayanger tsümartem jenjang dang nungi tesensakba aser tamajungba kümadoker. Atangji, asenoki junga meinyaktettsüba mapa kar lir. Itemji longru amshia kiojen yangluba mapatem ya asütsü. Tanü asüngbo longru amshia kiojen yangluba mapatema asen nisungi inyaker, ajisüaka topur junga yangluba nung ano asenoki tsümartem tekabosa matoksar, kechiyong longru amshia cement mapa inyaktsüba ya akhidang nungi inyaka aruba mapa masü tanü asüng tsümartem dang nungi angazüka inyakerba dang lir. Item mapatem dakji alaka, tsümartem dang nungi asenokiang tajungba inyaktettsüba mapa aika lir. Item rongnung dokan amentsüba mapatem ya toktsür autorickshaw aser taxi anishitsüba mapatem yabo asenokisa tajungba inyaktettsü. Tang Dimapur nung autorickshaw meyirijang pongo dak tali lir aser yamaji Dimapur aser Kohima na tsüngda senzüba taxitema noklang aika alitsü. Itemji Naga nungertemi anitsüla. Dimapur nung Naga nunger aika telok tenüng tapu balala amer chiyongtsüa maka meshimetsüa senzür. Iba kasaji Naga nunger lanurtem aika mapa maka kidang mobile phone mesükshia amonger. Naga nunger lanurtembo government mapa tilaka mengura alima nung teinyaktsü mapa kecha maka  ama bilema kazülongzüa senzür aika lir. Item jagi linük tenzükertem telok balala nung adentsü aser par telok tenüng menüktsütsü. Temeimtsüka, iba ama nisungji aika senzüdagi. Iba tebilemtsü anendaktsütsü asoshi asenoki kati ka ajungshiteptsüla. Dimapur nung auto aser taxi anishiba agi anogo nung sen meyirijang kabo melamelaa aar. Tanü item rongsenji Naga nunger ket nungi tsümartem dangi aor. Item rongsentemji teimbaka Bihar aser Assam leni bener oadoker. Tangarbo, Nagaland nung autorickshaw aser taxi anishiba agi Bihar aser Assam lenji ki tajung yanglua lir aser alu tulu ayimer saka asenokbo mapaa maka aser chiyongtsüa maka ta auyatsü dang bilema amonger. Talisa Naga nunger lanurtem asoshi tanü ya kazüa dangbo melii mapa kabosa inyaka Nagaland rongsen jenjang tudaktsüba nung shilem agitsüla. Iba shilemji Naga nunger lanurtemi autorickshaw aser taxi gari aser bus amshia peisasa pei taküm aser kibong mesüteta litetba jenjangji asütsü. Autorickshaw meyirijang pongopronglaji Naga nungertemi anishi nung kodaka rongsenren nung azükarutsü ? Aji oda, taxi gari ajunga Naga nungertemi anishiba agi Nagaland nung mapa makaba tebilemtsü tuluka koktettsü. Joko, tangalenbo yimtitem nung amshiba taxi service smartphone nung internet ajanga kechi komalaka gari ka nung senzür ibaji online nung ajatsüsa ‘ola’ aser ‘uber’ ama taxi servivce lir. Iba ama taxi service nung senzübajibo gari anishirtemi ashioktsütsü lenmang mali kechiyong iba gari senzüba ajungaji internet nung repranga atar. Iba ama tanü putu den apet mapa adokdang lanurtemi jet ta tama raktepa item mapa tasentemji asen lima nung bener aruagi tenzüktsüla. Teinyaknertem atemabo asenoki inyaktettsüba mapa ya inyaker meinyakma aika lir. Ajisüaka, kidang asenoki kilir ayuba ajanga asenok tain küma asenoksasa asenoki soruchioka süng mechiyongtettsüsa asenoki litetra, asenokji kibur masü saka asen kilir alar akümtsü. Iba ama tia kaji asenoki majurutsüsa asenoki inyaktettsüba mapabo pi nem meinyakdaktsüi asenoki asenoksasa inyaktsüla.