Asenoki inyaktsüba mapatem

Pangsha nung taoba ita August 28 nü Assam Rifles purtemi NSCN-K purtem mena lir ta bilemer bike ka, gypsy ka aser Tata mobile gari ka ta  külemi ooya alidang tebilemdang mali kenyongi injang sashia yoka amakba otsü nung asenok asoshi tangazüktsü aser teinyaktsü mapa aika keta aliba reprangtetter. Pangsha ya Nagaland nung Noklak sub-division kübok lir. Iba tesem ya Myanmar arrtsü nung asünungji, India o Myanmar nungertem iba tesem nung ajurutepa shishilembateptsü asoshi International Trade Center asütsü tesem mesemteta lir. Atangji, tangbo gari lenmanga junga lapoka maliba agi kin ana tsüngda ya shishilembaba mapatem metenzükteti lir, ajisüaka kodang kin anaprong tsütsü terenlok mapa junga inyaka oa gari lenmang sadema lapokdir, idangjibo Pangsha ya asenok ajak asoshi kanga tongtibang shishilemdak tesem ka asütsü. Tanüa iba tesem ya asenok asoshi tongtibang tesem ka lir, kechiyong iba tesem ya ajanga asenok kibong aser arogo aikati Myanmar nung Tsüngrem mapa inyaker. Asenok asoshi tajung kaji India o Myanmar na ya alima kin balala süaka anatsülen Naga nungertem alinunngji, asenok asoshi balaka temelaba meshitsü menüngdaker saka tangatettep nung oli aruli ta senzütetter.  Aji oda, August 28 nü Assam Rifles purtemi tetsür tanur mena aliba garitem ooya alidang amakba lendong nung yirutsür rongnung Myanmartsür aiür chanu ka tenüng agi Thamaioa liasü. La ya shitakba agibo Khiamniungantsür saka Myanmar kübok aliba Khiamniungan yim Pounyu nungi lir. Iba tia majung tenjiba anogo nung Assam Rifles purtem yira aita parnok amenba gariji amakdang la teku aser teberem nung injang agi yirutsü. Iba amaji yirur külena la mesüi kümtetbaji tesüngmangtsüka aser iba otsü nungji la taküm kuli keta lir. La yiruba anogo nungjisa Noklak mozü kidang anepalur Tuensangi yok saka Tuensang nunga anepalu mesütet Mokokchungi yok. Ajisüaka, la onsara mejungi yirua aliba agi Mokokchung mozü kidanga meyaritet, idak nung jagi Kohimai yok. La yirur Noklak nungi Kohima atongdang ghonda 40 agi aser iba mapang nung la tetsüng anapronglaji marakzüteti kümer liasü. Tangbo, Tsüngrem taochi agi kija, kibong aser arogo nungertemi yaritepba ajanga la taküm tasütsüba lendong nungi kümzüka lir. La ya par yimlen temeim mapa inyaker telok ka tenüng agi ” Love Burma Mission (LBM)” nung nurse mapa inyaker. Iba mission yagi Myanmar nung Naga nunger yimtsüng pongo nung temeim mapa inyaker. Iba mission nung shilem agirtemji Nagaland nungi  Union Baptist Church Kohima, City Church Kohima, Chang Baptist Lashong Thangyen, Khiamniungan Baptist Christian Association aser Phom Baptist Churches Association nungertem lir. Thamaioa ya kar teyari ajanga Dimapur Govt. Higher Secondary School nung class 8 tashi azüng aser LBM nung inyak tenzüker küm kata mejungi lia iba lendong ya ajurur. Tang tashi la yarir doctortemi la ya akhi ama jajaa aotsü akoktsü asü makoktsüar meshitetter, ajisüaka la tamang onsara tulu asünungji, lai la temang akhi ama shia arur kasa mission nung Tsüngrem temeim mapa inyaktsü matatetter. Tang ya la mozü kidang lir aser la aser lar kinüngertem atema la yarir arogo nunger kibongtemi anogo shia melentepa chiyongtsü belentsür aser parnok nüngdak agütsür. Mozü kidang la anepaluba taa agütsütsü asoshi Naga Mothers’ Association purtemi mepishiba ama Chief minister office nungi agütsür. La den ano LBM nung inyaker la ama Health worker trok lir. Iba lendong ajanga asenok dang asenok nisungi Myanmar lima nung Tsüngrem mapa koda inyaker, aji tilaka sayur. Iba amaji Thanamir aser Longwa len nungi oa Myanmar nung Tsüngremm mapa inyaker Naga nunger  kibong aser arogo aika lir. Itemji asen nübortem aser asen wadang lir. Joko item tesemtemji yakta alima terenlok agi meneptsü aser parnokia asangsang nung alima jangratem aika ajurutsü. Iba mapang jagi parnok matongdang asenoki parnokji Tsüngrem temeim aser Yisu Khrista osang tajung agi tongtsütsüla aser kaketshisatsü agüja parnok nüji kümdaktsür alitsüla. Iba mapa nung Aor kibong ajaki pei akok shilem agitsü ayongzüker.