Asenoki jaokba timtem

Tang ama meiwa mapang tzünglu kanga sashia arudang anentsü aluba aser lenden lima tzümetsüng adokbatem ya alima nung nisungtemi nokdanger menokdangtetba timtem aser tebilemtsütem lir, anungji asenok kümdanga alitsüba dak alaka tzünglu aser tzümetsüngbo asenoki menokdangtettsü. Ajisüaka, asenok asoshi takoktsü kaji tzünglu aser tzümetsüng agi bener arutsüba lendong, takoksa aser timtem nungibo asenoki asenoksasa jenbutettsü. Aji oda, asen lima nungsa asüyonga Dimapur ama lenden lima nungbo küm shia tzünglu aruba ajanga kiyong aika nung nisungtem telidak ki dena atsüngbanga takoksa ajurur. Iba kasa lendong timtemji Dimapur nung tanüa atalokdagi aser Kohima nunga dena yimti yimdong motzü agi atsüngbanga ayimba angur. Item timtem lendong aser takoksaji kodang bilemdangdir, lenden limasa asüyonga Dimapur ama ayong agi meketbanger aliba tekong nung tzünglu mapang tatsüka aru nung yimti yimdong dena tzü agi metsüngbangtsüsa atalokbajibo tzünglu aruba agi masü saka asenoki asen alidak nungi tzü yimzüka aotsüsa lenmang sadema meyutsüba ajanga atalokba timtemtem lir. Ashi, Dimapur lima yateta mesemteter dang pelatsüba kaji, Dimapur ya lenden lima tenzükdak tekong mejungketa aliba tesem ka reprangteta mesemtetba lir, anungji anüdok aser anülulen ajaklen yimti kümteta aliba tekong nungi tzünglu arudang tzü melamelaa pasasa süzüka aotsüsa teküpboklen ajaklen ayongnutem lir. Aji oda, asen lima nung tzünglu aruyonga anogo piyong mesüra aonung piyong arubabo masü mesüra ayong nung tzü agi masem mobanger adokba tzümetsünga masü saka ghonda ka shi danga tzünglu aru nung tzü taolen mali pei kima atsüngbangtsüsa akümer, anungji ibajibo asenoki asenoksasa jaokba timtem-ang ka lir. Iba timtemji asenoki mebilemdangi ali rongsen arishia kiojen yangluba nungi ataloker. Atangji, government nung alirtem dang atongtsüa tuluka lir, kechiyong government nung lenmang reprangtsü purtemi lenmang merepranger, anungji lemang yanglu dang kilentzü mali ser yanglur aser ano tesem aika nung lenmang teküpbok aser kilentzü teka ta ser yanglubaa asenoki angutsü. Iba ama lenmang aser kilentsü yanglur engineer-temji tesüngmangtsüka lir aser ano iba dang nungi tesüngmangtsüba kaji lenmang junga meyanglubajibo toktsür, tzü taolen malitsüsa lenmang yangluba mapa agi tenük sünger sen (bill) agütsürtemji asütsü. Aji oda, Nagaland nung ya lenmang meyangluba agi lenmang majung timtemer masü saka Khristan tulur aser contractor-temi sen achitsü bilema lenmang mashimashi yanglua toktsüba ajanga timatemer. Atangji, tang asenoki ajuruba timtem aser takoksatem ya Khristan tulur aser contractor-tem dang kisüng atongtsülabo masü, kechiyong asenok Khristan pur nütsüng nübortemia Tsüngremi moatsüba rongsen amshia ali kimong aser kiojen yangludang, asenoki tangar asoshi dang masü saka asüng asenok lia aotsüba anogotem indanga mebilemi tzü aolen nokdanga yutsür aser asenok karibo akhidang nungi ayong küma tzü yimzüka aolen ali agi onbanger iba madakji ki yanglur. Item purtemji takartem lir saka pei akaba agi alima topur jungdaktsütsü bilema inyakertem masü, saka ozü kara ojang, ozü kimong aser ozü ki sadema yanglutetra ojang ta bilema motzü aolena mali ki yanglur aser karibo yimkong jajaba lenmang dena agisemertem lir. Iba jagi tang ama tzünglu aruba mapang pi dang masü saka pei dena kidang nungi madoktettsüsa timtem ajurur. Tangbo tzünglu mapang tatsüka aruba ajanga tzümetsüng agi timtemba indang jembir, ajisüaka kiojen aser ki oset aser alu raksaba dak alaka nisung asü-amababo mali. Aji oda, anogo ishika sülen tzümetsüng ya aremtsü aser ano asenoki timtem ajurutsüba indang ya amadoktsü. Ajisüaka, ano asenoki jaokba lendong tuluba ajurutsüba ka anünga lir, aji menoknok lendong asütsü. Tia makaka asen lima nunga menoknok teyarika anok nungbo, anok manok ka laotsüsa kiojen aika asenoki mashimashi yanglua lir. Aji oda, tzünglu aruba agi masü aser menoknok anokba agia masü, saka asenok merumeruba agi asenoksasa, an molokbang nung atema ama, tanen maka lendong timtem ajurutsü anendaka lir. Iba ama lendong timtemji majurtsü atema government inyakyim akangshitsüla aser nübortem daka tangatetba alitsüla.