Asenoki Khrista tesangwa ajaklen prokdi: Atola Subong

Mokokchung, December 21 (TYO): Mongsenyimti yimtak Mongsenyimti Baptist Arogo küm noklang jongmong sentong tanünübuba, Dec. 20, 2015 nü New Woman Ministry, Shillong Founder Director, Atola Subong-i ‘Khrista Sangwa nung Pututem’ onük nung jembia liasü.
Lipok kaket nung ajemdaker Atola Subong-i, “Tsüngremi nisungji Pa mesükba nung yanglu saka tetsür aser tebur nati külemi temenen ajurua nisungi Tsüngrem ama kümnüdang nisung dangi temenen ait. Tanü-a nisung jenti-i Tsüngrem ama kümner, aser Tsüngrem ama benshir,” ta ashi.
“Tsüngrem ya kilir ka masü saka Tsüngremji taküm aliba Tsüngrem, Tsüngremji tesüngmangtsü Tsüngrem. Joko asenoki kua-kua ta masü saka ali küma apudaker tatok meshia külemtsüla,” ta lai ashi.
“Ammang nung alirtem atema tesangwa ka arutsü ta Ainkartemi shin-a liasü, aser iba tesangwaji Yisu Khrista lir. Iba Centenary nungi temoatsüji Khrista tali meteta akümba asütsü,” ta lai ashi.
“Khrista sangwa nung pututem, ta dang magi-i iba dak alia asenokia Tsüngrem dang Nü tesangwa onok dak yalokja iba tesangwaji alima ajaklen proktsü atema ozü nisunga yokangni ta sarasademtsüla. Tatem nungbo Tsüngremer government dang anüngtsü. Tsüngremer government nung ni-a minister/pastor ka kümdakjang, ambassador ka kümdakjang mesüra tenzüker tajung ka kümdakjang ta sarasademdi,” ta Atola Subong-isa Centenary mongertem ayongzük.
Iba sentong nung mendenji Wt. Renemla Ozukum liasü, Yisemyong Baptist Arogo Sannüker, Akangmongba-i Lai zünga sarasadem, Parliamentary Secretary Vety. & AH, Wb. S Chuba Longkumer, Mongsenyimti Village Council aser D Yongnyak Konyak, Dimapur nungeria o tatsütsü jembi aser Mongsenyimti Compound Baptist Arogo Sannüker Wb. Imtimenpang-i tayongzükba o jembia liasü.