Asenoki mamanger !

India kübok tesem balala nung mamangba purtemi Khristan purtem reshikangshiba ya asenok aikati mamanger, kechiyong asenoki tenük agi itemji mangu. Ibaji dang masü saka ano Khristan purtem anemertemji yimten nung tongtibang aser tashi tait telok, anungji item tashiji asenoki metizüktetter. Atangji, asenok Khristan purtemi Naga lima Khristan lima kümdaktsütsü asoshi merangba ama Hindu nungertemia India ajak Hindu lima kümdaktsütsü merangba nung kecha tai mali. Ajisüaka, Khristan purtemi Naga lima Khristan lima kümdaktsütsü asoshi Naga lima nung yanglua akaba tanga yimsü amangertem meyong tekülem ki raksatsüra, ibajibo Khristan yimsüi memelaba mapa ka asütsü. Iba amaji ano Nagaland nung alir ajak Khristan kümdaktsütsü asoshi tanga yimsü amangertem anema amokmerena tashiyim mapa inyakra, ibajia Khristan yimsü dak maketba mapa asütsü. Khristan purtemi limapur aser süngyanglu külemertem Yisu dak amangdaktsünübaji parnok dang nungi langka tajangzük angutsü asoshi temulung meyipdaktsütsü meranger masü saka parnok tanüla molumileni moudaktsünüba agi temeim agi kümzükner. Ibayongji, Nagaland nung asüyonga mesüra linük tesem kong südir süaka Khristan purtemi temeim mapa inyakba dang angutsü aser angashitsü. Iba kasa tangatetba nung “Nagaland Khrista asoshi” ta ayimtenaka Naga Khristan purtemi tanga yimsü amangertem nem timtem agütsüba aser parnok tekülem ki raksatsüba osang mangashi. Iba kasaji India tesem ajaklen Khristan purtemi temeim mapa inyaker. Iba jagi balaka sensaker aser makamaitertemi tama Yisu temeimji angateta Khristan yimsüji agizüker, kechiyong Tsüngremji temeim lir. Ajisüaka, India nung tanga yimsü amangertemi Khristan anema inyakbaji tebang agi ashitsüla masü inyaker. Tangbo India kübok state aika nung Hindu yimsü amangertem Khristan akümbajibo ozüng anema saka Khristan purtem tanaben Hindu yimsüi meyipbajibo pei kidangi meyipa arur ama agizüktsüsa ozüng lateta lir. Iba jagi Khristan purtem aika timtem reshikangshi tulu ajurudagi. Asenok Naga nunger Khristan purtemi tebang agi tangar dak atalokba indang jembiba dak alaka Yisu dak amangba agi reshikangshi timtem takoksa aser tasüba ajuruba kangabo malitsü. Ano, Yisu dak amangba agi Naga nunger tepoukdak ayuba osangba mangashidang. Ajisüaka, tang Odisha nung Khristan purtem timtem takoksa aser reshikangshi ajurubaji yutsür parnok tenet tashi taküm piyong tepuokdak ayutsü atema obendang agütsür puoka aliba purtem tiaji temeimtsüka lir. Nüngtugu osangbener Anto Ankkara-i ashiba agi, parnokji 2008 küm Odisha nung Kandhamal ta ajaba tesem ka nung Hindu nunger putir ka tenüng agi Swami Laxmanannda tepsetba maparen nung temulung melemi apurtem lir. Parnokji tai maket aser mazüngmemetetba yimtaklirtem lir saka Khristan asüba agi tiyazü tai tongloktsür puoka ayu. Item tai maketba Khristan purtemji chioktsüla ta Anto-i anir tang online signature campagin ka odagi. Swami Laxmanananda tepsetba sülen parnok apubaji dang masü saka nisung noklangka shi tepset, tenla ki 300 raksatsü aser Khristan pur ki meyirijang trok shi raksatsü. Itemji talidak aser tekülemdak maka tang tashi timtem reshikangshi aika ajurua lidagi. Ajisüaka, tesüngmangtsü kaji, Kandhamal nung iba amaji amangba purtem reshikangshia tepsetaka shinga Khristan yimsü toktsür moi tamangba nung takangba-takangba akümer. Item tamangji asenok ama tamangerbo tamanger saka jungjunga mamangertem asoshi tatishitsü tuluka asütsü. Ashiko, asenokibo parnok dak atalokba amato Yisu dak amangba agi kidang kibong nung asü ama aser reshikangshi atalok nungbo idangjisa yimsü melentsü südi. Atangji, asenokbo reshikangshi ajanga masü saka alima rongsen aser yimten nung jenjang tajung agi asenok tamang tendanger. Ibajia metizükteti asenok aika tamang nung tsükadokogo. Tang asenok tamang tia yao Tsüngrem tsüngdang dang masü saka Kandhamal nung aliba amangba purtem matsüngdanga taaktsüka kümogo !