Asenoki ozüng dang ozüng majar

Alima nung temzüng ozüng lateta ayuba ya nisungtem kangshitsü aser akoksadaktsütsü asoshi masü saka nisungtem libaliru aser inyaksangshi ajak nung timmedemdaktsüi liromedema ajangzükdaktsütsü asoshi lir. Ibayongji, ozüng shitak amshitetba lima aser ozüng kübok litetba nübortem tesünep nung terenlok mapatem shitak inyaka topur junga lia oteter. Iba ama ozüng shitak amshia otetba limaji asen lima asütsü asoshia asenoki ozüngbo kanga lateter saka mapa küma amshia mouteter. Item tamakok rongnungji tang Nagaland nung yi meyanglutsü aser mayoktsü ozüng azüngba, Nagaland Liquor Total Prohibition Act, 1989 ya ka asütsü. Adangji, iba tamakok ya kodang jungjunga reprangdangdir, Nagaland nung yi nokdangba ozüng mapa küma mamshitetba yabo, ozüng benshitsü merangdanger makokba masü saka ozüng laleta yur ozüng dang ozüng maja, kenyongi mamshidangi dang zükdaka yutsüba ajanga lir. Aji oda, yi meyanglutsü aser mayoktsü ozüngbo lateta alinungji, shingaia yimjak nung yi meyanglur aser mayoker saka kecha tarendak makai miima saka odi-odia amai taolen ajak nung yi angur. Ibayongji, asenok aikati Nagaland nung yi mayoktsü ozüng lateta ayuba yagi yi miima ayokertem dang takar kümdaktsür aser yi jemertem jenjang tasak agi aliba ajanga tali tesensakba kümdaktsür ta jembir. Yi mayoktsü latetba tajangzüktemji aji dang masü saka ozüng alema yi yangluba aser ayokba mapatem mittsü purtem dena tajangzük tulu ngua alitsü amai bilemer. Ajisüaka, ozüng alema yi ayokba nungi anguba tajangzükji asenok nük agi tajangzük amai angur dang ashi, aji tajangzük masü saka takoksa angu tenzüker asütsü, kechiyong tatem nungbo yi ayokertem aika takoksa nung tembangba nguogo aser yamaji ataloktsü. Alima nung yi ayokba nungi aruba rongsen agi yimten yangertsü aser kibong mesütsü ta bilembaji, asenoki asen alitsüba lima tajung tuluka mangu yutsür alima tamajung tilaka nükshia yangji dang linüba amai lir. Yi meyanglutsü aser mayoktsü ozüng latettsübaji mapa tajung ka anendaktsüba masü saka yi ajanga pei taküm aser kibong meraksadaktsünüba agi, yimsüsürtemi memeulungaka, arogo lenirtemi anir nübortemi kangshia latetdaktsüba ozüng ka lir. Iba tangatetba nung yimsüsürtemi anir iba ozüng amshitsü purtem ajungai Nagaland nung yi nokdangtsü ozüng lateta aliba ya akok tashi mapa küma inyaktsü merangtsüla. Aji oda, yimsüsür aser yimten nung ketdangsertemia iba ozüng nung kechi koma shia ali, itemji bushidanga metettsüla. Tanübo tenüng agidang ozüng lateta yur yi yangludaktsür aer yokdaktsür asünungji, yi tamajung-tajung mebendangi alia ajemba agi tang mapang tatsüka tsüngda nung Nagaland tesem balala nung nisung 23 asüba osang angashir. Ibaji Nagaland nung yi mayoktsü ozüng lateta aliba dang atongtsü makok, mesüra yi mayoktsü ozüng agienba agi ajungtsüa masü. Tamasa, Nagaland nung yi mayoktsü ozüng magien dang, Nagaland nung ozüng yanglurtemi anir ozüng amshirtem ajaki ozüng mapa küma inyaktsü mulungtettsüla, kechiyong yi ayoktsü melaba nunga ozüng lateta alitsü. Ajisüaka, asenoki tang amai ozüng dang ozüng maja, ozüng yanglurtemiang anir ozüng raksara aser ozüng amshitsü purtemi anir ozüngji sen yong ayoktsü dang bilemra, asen limabo yi ayokba aser mayokba agi masü saka ozüng mebenshitetba agi raksatsü. Aji oda, tang yi tamajung ajemba agi nisung asüba ajangaji asenoki asenok dang yi yimjak manung ayok tenzükang ta ashir amato angatetra, aji asenoki aibelena angateter asütsü saka adangji nung, yi tejem ta nenshia ashir amai asenoki angatetdi.