Asenoki sepaitem dang pelaba mapa agi sayutsüla: Rahul

New Delhi, October 29 (Agencies): Congress tatong Tir, Rahul Gandhi-i shidi ka ajanga Ato kilonser, Narendra Modi dang, tesüiba hopta ishika tsüngda sorkari agiba telemtetbatem ajanga pa jashir, sepaitem dang nangzükba ama mapa agi inyaktsüla, ta ashi.
Paisa Modi’er sorkar dang sepaitem taküm jenjang tajungba atema inyakang aser ‘One Rank, One Pension’ scheme tajungtiba agi benoka inyakba den külemi parnok tebilemtsü onüktem atema inyakdaktsüner, ta ashi.
“Diwali mapang nung sepaitem dang asenoki parnok dang pelabaji o aser mapa napronglai sayutsüla,” ta Ato kilonser dangi züluba shidi nungji Rahul-i shia lir.
Linük arrtsülen tanüker sepaitem den Diwali benjung osang lemsateptsü atema Ato kilonseri linük nüburtem ayongzüka liasü.
Rahul-i, “Asen sepaitemi surgical strikes aoba sülen anogo ishika tsüngda disability pension maparen melenshiogo, taküm lemta-a akumer tasütait sepaitem indang pension sen ajema kümtsüogo,” ta ashi.
“Ex-servicemen melungsüdaktsütsü atema OROP ya junga benoktsüla aser 7th Pay Commission nung matoksabatem atema  tekaratiba nung inyaktsüla, kechiyong linük atema mapa tajung inyakba atema sepaitemi parnok tim tangutsü meshitsü asoshi timtem majangshitsüla,” ta Rahul-i ashi.
Rahul-i ashiba agi, sorkari agiba telemtetba kar ajanga asen armed forces melung mechidaktsü.
Rahul-i, “Khuret aliba democracy ka ama asenok atema taküm bendanga agütsütsüpur tasütait sepaitem dang nisung crore 125-i pelaba sayua asenoki sepaitem dang temeim sayutsüla, nungittsüla,” ta ashi.
“Anungji ni na, Ato kilonser dang civil sorkar mapa inyakertem den liromedema asen sepaitem nema parnok tangutsü tim- compensation, disability pension agütsütsü mepishir,” ta Rahul-isa ashi.
“Asenok Diwali amungdang asenoki sepaitem dang o aser mapa napronglai asen pelaba sayutsüla. Asen tarutsü atema tanü taküm bendanga agüja tenzükertem atema tajemtiba agi asenoki ibajibosa inyaktsüla,” ta shidi nungsa shia lir.
Pai Ato kilonser dang, “Linük atema anogoshia sepaitem taküm lendong nung nokdaka lir, anungji parnok aser parnok kibongtem dang asenoki o agi dang masü saka mapa agia pelaba sayutsüji asen teinyaktsü mapa lir,” ta shisem.