Asenoki Shisadangdi

–  Dr. Toshimanen Ozukum.

Maneni iba osang kaket tajungba nung adoktsü teimla tulu lir.  Yashi temoatsü sentep nung onok Fellowship nung ni Lai zünga sarasademtsü maongka anguba indang yangi Tir Yimyim azünger ajak den iba zülu ajanga lemsatepner.

Iba Laishiba azüngtsü maongka sentong nung adoka anguba anogo nungi ni Laishiba tejenba aser tasenba den ano English nung New International Version den medemdanga bushir yamai azüngba ajanga temoatsü tulu angu.

Lai: Tenungsang Ken tapu 1: SHIBAI TAMAJUNGPUR TASA NUNG MEJAJAR ASER TEMENENPUR LEMANG NUNG MENOKDAKER ASER MEJAJAR MESÜRA SENSAMASATSÜR MENDEN NUNG MAMENER, IBA NISUNGJI TEMOATSÜBA. PAI KIBUBA OZÜNG NUNG JANGRA ATEMER ASER MANGLI WANGWALI PAI KIBUBA OZÜNG  NUNG SHISADANGER. AYONGKHUM NUNG ATEMBA SÜNGDONG KOBAI PEI TSÜNGKHÜM NUNG PEI TEJANG TANGTSÜR,  PA AJI MESÜKA LIR. PA TOA MAZÜLAR ASER PAI KECHISA INYAKDIR AZÜKARUR, TAMAJUNGPUR YAMAJI MASÜ. PARNOKJI MOPUNGI ONER AOBA TSÜKSÜ AMA LIR.ANUNGJI TAMAJUNGPUR O BENDANGDAK MENOKDAKTSÜ MESÜRA TEMENENPUR TEMESHIPUR MONGDANG NUNG MENOKDAKTSÜ. KECHIASER KIBUBAI TEMESHIPUR LENMANG METET. SAKA TAMAJUNGPUR LENMANGJI SAMATSÜ.

Iba tapu ya tekong ajak agi 6 tang lir. Saka yangi asenok asoshi tangazüktsü shisatsü jendi lir. Khristan saka asenoki memeteti aiben tamajungpur tasa nung jajar. Tongtipangsa shisa maka tongmelangertem aika  tamajungpur tasa nungji jajar aser tatem nung lendong nung alanger.  Alima nung shisa takatiba Solomonia pa Apijemtsü Shin tapu 12 : 15 nung yamai shia lir, Tamashir ka lenmangji pei nükdang shidak lir. Saka shisa takari tesayuba dang angar.

Temenenpur lemangji asenok ajaki meteta lir. Aji saka metetsümonga oda  iba lenmang nung nokdakertem mesüra iba lenmang nung anebertemji joko tesamatsübasa. Majung ta meteter oda inyakdangdi ta asen molung nung aiben jembir. Oda kecha masütsü alitsüa akok kechiaser nisung ajaki yamai inyaker saka kecha masür ta bilemer aiben tamajunger lenmang nung nokdaker. Tatishitsü agi asenoki asen sobaliba wazüka ayutsü nüngdak ta sür Khrista yimsü marudang oboula nungeri amungba amung-tsümung ajak leplalepshia amunger. Iba ama Moatsü aser Tsüngremmong nung tsüngsangtepa yi jemtepa nakluteba naloknara ken tenteba amunger. Ibai tamajunger mesüra temenenpur lenmang nung amenba aser nokdakba rongnung ka lir. Yi jemteba konang nüngsang ken tenteba amungba dang nungi tanü Khrista yimsü den apet mamatzü temeja mesüra pigaja den shito mayonga  oboulanunger kensü saka Khrista tenüng uludakja Pa tushia aser Pa tenüngsanga ken tenteba amung nunga ajungtsü ta bilemer.

Apijemtsü Shin nung Yi koba nung teraratsü lir aji agi temeseb ta shia lir. Kodang yi jemdir nisung teimbaka rasar aser ain adoka rarateper. Tatishitsü agi election mapang nung yi melena nashi mamatzü temeja jemdaktsür raratepang ta ashi nung ni amanger shingaia merarateptsü. Laishiba nung nai tetepset ta shia lir saka oda nisung tepseter. Anitet tapu 20: 13 nung  NAI NISUNG TETEPSET ta shia lir. Aji saka odang nisung tepseter. Ano kasa tapu tekong 14 nung NAI NÜKTAPANGTA TEBENSHI ta shia lir. Aji saka odang nüktapangta benshir. Yisuibo tenem nung nung sayutsüngitang Pai ashi  YAMAI ZÜLUA LIR  NAI NÜKTAPANGTA TEBENSHI.  AJI SAKA NI NENOKDANG ASHIR SHIBAISA TETSÜR KA DAK  TENÜK AGI AZÜABONGA REPRANGDIR PAI TEMOLUNG NUNG NÜKTAPANGDA BENSHIR. TENÜK AGI TANGA TETSÜR KA DAK AZÜABONGA REPRANGRA IBAJI TEMOLUNG NUNG NÜKTAPANGDAR TA YISUI ASHIR. TENÜK AGI AZÜABONGA REPRANGBA( LUST OF THE EYE) IBA YAA TEMENENPUR LEMANG NUNG NOKDAKBA KA LIR. YOBI YAMAI ASHI NI KÜ TENÜK DEN O ZÜNGTEP. AJANGLA KODASER NI AIER KA DAK AZÜAPUNGA REPRANGTSÜ? (YOB 31:1). IBA AMAJI ASENOKI TEMENENPUR LEMANG NUNG MAMENTSÜ MESÜRA MENOKDAKTSÜ TANG NUNGI ASENOK AJAKI AZÜNGASHITSÜLA.

Kodang metetsümonga nisung kati temenen menadir ibaji kokua Tsüngrem dang nangzüktsüla. Davidi temenen benshi saka kodang pai inyakba temenenji pai meteta aru pai khukua nangzük. Peteri Yisu asemben menangzük. Saka kodang Yisui temeim agi Peter dak rangita aji pai kidangi orr khukua ajeb aser ibaji nangzük. Yihuda Skarioti senpak semer yong Yisu ayok aser ibaji tai ta meteta aküm, pai iba taiji Yisu tsüngdang menangzük. Ashiko oda kangkidong nung tasütsü lia auersangi temolung meyiba Yisu dang tadok meshi nung idangjisa Kodaki anir aoba ama Yihuda Skariot danga tai adoktsü lemang liasü südi ta bilemer. Saka pai peisasa soseta asü. Iba amala temenenpur lemang nung amenertemjibo kecha o bendangtsü mali indang indanga tang molumi nung ajungoktsütsü. Ibajagi T.Ken 1: 5 nung  tamajungpur o bendangdak menokdaktsü ta ashibaji pa atema akümlidang o bendanga dokogo kecha o bendangtsü mali oda indang indanga dang molumi nung ajungoktsütsü ta ashiba südi ta angateter.

Anungji iba Tenüngsang Ken tapu ka nungi asenoki asenok dang nungi tamajungpur tasa nung mejajatsü, temenenpur lemang nung manentsü aser menokdaktsü mesüra sensamasatsür menden nung mamentsü angazükdi. Asenoki asen temolung nung tangar sensaja mebilemli. Asen tebang agi mashi mejembir saka temolung nung bilembajia Tsüngremi meteter. Iba ajak nungi asenok mürekdaktsütsü Pa temolung lemtetba aser temeshi lir  ta mezüng Yohan 1:9 nung shia aliba dak amanga asenok ajaki pei pei temenen ajak nangzüka Khrista nung taküm tasen kümshidi ta iba zülu ajanga ayongzüker.

TSÜNGREMI MOAJANG.