Asenoki Tsüngrem aniba putu

Tanü asenok kija taküm libaliro, lokti, yimten aser arogo sobaliba aser inyakyim ya jungjunga reprangdangra, Tsüngremi mulungba nung asen anidaktsür masü saka aseni mulungba nungang Tsüngrem anitsü merangba asenoki asenoksasa reprangtettsü. Aseni asen inyaktsüba mapa nendaka meinyak ser Tsüngrem dang moajang ta sarasademer. Election nunga asenok inyaknütsü inyaka takok angur aser tesüsabo mapa tamajung inyakba ajak to Tsüngremi mulungba inyak amato Tsüngremi shimtet ta bilema Tsüngrem nem tenüngsang agütsür. Sübokrem amshia mapa ayoker aser alir aser aji Tsüngrem temoatsü kümdaktsür. Yimten nung ketdangsertemi nübortem asoshi terenlok mapa inyaktsü lemzükba senotsü aser sensaker aser mekokmeinertem atema lemzüktsüba teyari ajak okshia agir aser aji Tsüngremi moatsüba amato Tsüngrem nem bilemdaktsütsü atema, teraka agiteta temeim mapa inyaker, arogo nem tenla agütsür, tenla ki dena yanglutsür aser mission mapa asoshi tenla abener aser tanüngba jagi peisasa pei takar akümer. Ashiko, tanü asenok arogo tenla ki yangluba aser tamanger aser tenzüker tajung meliaka arogobo mesamai taküm aliba ya, khen asoshi, ochimashi tenlatem agi inyaktetba aser taküm lidaktsüba mapatem asütsüa akok. Aji oda, ochishia süra ki ka nungang alitsü asü (?) mesüra ochimashiba rongsen agi yangluba sentsüprang ki tajung nungang alitsü ta asüba lenjem nung asenok nokdaka lir. Tasoba küm dena asenoki Tsüngrem tsüngdang miimshitsü meranger. Asenoki Tsüngrem dang taidok meshia sarasademzükli tiyazü bill yanglur, aji oda government file ajak tiyazü agi sünga lir. Asenoki yimten nung takok angutsü mechi Yisu tenüng nung Yisu yimsü magizüktetba purtem den longjemer asenokiang Tsüngrem anishitsü meranger. Joko, alima agi ojangji, kibong maküm tashibo tetsür o tebur na shi nung ka küma temedem ta ashitsü melena Condom amshia kazütsü asoshi arogoia dena ajungshir. Ajibo tezü nung yutsür, joko alima nung nisunger yimya asünungji, parnok lechii oagi tetsür o tetsür na aser tebur na tebur na apuani küma arogoi kibong kümtsür. Aji oda, asen lima nunga joko kasa kidong nungi larlaponger kibong akümbabo tai masü amai agizüka yimten, lokti aser arogo nung shilem agiba angur. Joko, asenok aikati Tsüngremi asenoki tema nung inyaka sayuba mapatem masü saka temulungjang dang agir ta tangatetba agüja larlaponger aser atsüapong kasasa agi apuani küma alitsübaji Tsüngremi mulungba südaktsüner. Aji oda, asenoki Tsüngrem dang “Nü mulung sang” ta masü saka “ Kü mulung südakjang” ta dang shia sarasademner. Iba ama Tsüngremi mulungbaji akhi tejen yimsü aser aseni mulungba-ang tanü putu tasenba nung tapet yimsü ta agizüka benshitsüsa alima sobaliba tasen aika agi asenok meketbanger makdi asüba mapang ka nung, asenok ajaki asen meketa kechi ataloker, kechi jembir aser Laishibaia kechi ashir, itemji meteta sensaksemtsü nüngdakba agi taoba hopta nung asenoki iba osangkaket ajanga, “ Tetsür o tetsür na aser tebur o tebur na apuani kümer aliba kibong arogo nung züngsem kümdaktsü nunga koma süla ?” ta asüba onük nung shisalemsatepogo. Atangji, Tsüngremi kobanüa tetsür o tetsür na aser tebur o tebur na shi nung medemtsü aser apuani küma alitsü asoshi melaba aser moatsüba mangur. Ajisüaka, tanü putu nung Tsüngrem tenüng nung arogoi parnok kibong kümtsübaji Tsüngrem nem anidaktsüba arogo masü saka arogoiang Tsüngrem anishitsü merangba purtem asütsü. Ashi, Tsüngremibo tebur o tetsür na ajanga alima sünga nütsüng züindaktsünüba agi Adam asoshi tebur masü tetsür-ang ka yanglutsü. Tanü putu nung asen taküm aser kibong nungi tenzüker yimten aser arogo tashi nung asenoki inyakba mapatem ya reprangdangra, tebang agi Tsüngrem tetshir dang ashi, asenok teka ochimashiba agi sünga lir aser asen tenük aser temulungjang shi azü azüapong, nüktapangta aser morumoru tsütsü kanga memerüki lir. Tsüngremi mulungbajibo asenok Nineveh leni odaktsüner saka aseni Tsüngrem anir Tarshis leniang onür. Iba jagi tanü asenok ken o tilateri ajak nung mangmangteper aser tangari asenok tzüim nung ajungoka yutsür odi ta jembir. Koba mapa nung südir süang, asen taküm, asen arogo aser asen government-ji Tsüngrem nem manidaktsüra, asenok rongnung tebenja adoktsübasa aser oshi aika küma meputep adoktsü.