Asenoki Tsüngrem masü nisung tsübur: Khekiye Sema

Dimapur, July 09 (TYO): Nagaland nung ochimashi mapatem agi sünga lir saka Khristantemi ochimashi mapatem anema ola madoker, kechiyong asenoki Tsüngrem tsübur masü saka nisungang tsübur, ta Honibar nikongdang yangi Dimapur public ground nung Sinai Ministry purtemi anogo 40 asentenshi sentong ka ayongzüka amongba sentong nung Wb. Khekiye K. Sema IAS (Retd)-i tayongzükba o ka jembidang metetdaktsü.
Wb.Khekiye K. Sema IAS (Retd)  ya Nagaland sorkar mapa nungi anener külen, pai Nagaland nung tashiyim amshiba aser ochimashi mapatem anema tasü itta zülur aser jembir. Pa ya ACAUT nunga shisalen sayur ka lir.
Taonung anogo 39 buba sentong nung Tsüngrem O jembir marudang, Wb.Khekiye Sema-i tayongzüka o jembidang, America nunger missionary-tem par lima nung anisüngzüka jangratema alitsüba tensa tia tajung ajak toktsür, Naga lima nung parnok taküm agi tendanga timtemseta asenok kümzüknüba agi bendanga agüja inyakba mapatemji asenok asoshi tayongzükba tulu asütsü ta metetdaktsü.
Asenokbo Tsüngrema yimti tajung nung gari den ita sen tajung angudak dang tenzükner, ajisüaka America nunger missionary-tem amaji asenoki taküm bendanga agüja tangari matongba tesemtem nung Tsüngrem tenzüktsüji jangratsüla ta paisa ashi.
Ano, külen arogo nung Tsüngrem tenzükertem nem parnok kibong nüngdakbo peritsüsa arogo nungertemia ita sen agütsütsüla ta Khekiye Semaisa metetdaktsü.
“Asenok ya tasodang nungi Khristan kümer asoba Khristan saka tamanger tajung ka masü,” ta paisa metetdaktsü.
Paisa Nagaland nung ochimashi mapatem anema ajemajema melii apusotsü nüngdakba indang ashidang, nübortemi election mapang vote ayokba mapa ya anentsüla aser ochishia yimten nung shilem agitsü mapang tongogo ta metetdaktsü.
” Election mapang asenoki candidate dang sen meshia chitsüba agi asenoki yimten lenirtemi ochimashi mapa inyakba anema ola madoktetter. Taoba election nung constituency kar nungbo sen crore 45 tashi endokba osang angashiogo. Candidate-temi election nung akoktsü asoshi endoker, saka election sülen parnoki nübortem asoshi kecha meinyaktsütsü aser asenokia parnok dang kecha meshitettsü,” ta ACAUT lenirisa metetdaktsü.
Joko, asenok nisuing shiai pei lima asoshi tajung kakabosa inyaktsü mulungtettsüla ta paisa ayongzük.
Tanü anogo 40 asentenshi sentong nung ACAUT purtema jaoka shilem agidaktsüba indang ashidang, ” Naga lima nung tanüla nung dang masü saka loktiliba nung temelenshi nüngdaker aser iba temelenshi asoshi asenok nem teimla agütsürtemji ACAUT purtem ya lir. Parnoki ochimashi anema kanga tasü itta inyaker. Asenoki parnok asoshi sarasademtsütsüla aser parnok nungittsüla,” ta Sinai Ministry nung tongti ketdangser, Wb.Wabang Longchari-i metetdaktsü. Iba kasa sentong nung ACAUT purtem apudaka alidang teloki teka mekanga parnok asoshi sarasademtsü.
Iba sentong tetenzüklen, Lotha nunger arishi küm 80 shi tambur kati 1952 küm Naga limai asentenshi arudang Rev.Riküm ajanga temulung meyipa Tsüngrem mapa inyaktsü tenzükba taküm kuli agütsü.
Tanü iba sentep sentong nung Kohima nung Faith Harvest Church nung sannüker, Rev.Shan Kikoni Tsüngrem o jembia liasü.
Taoba ita June ka nungi Dimapur nung anogo 40 nü asentenshi sentong ayongzükba ya Naga limai 1976 küm Tsüngrem tanüla temeshi milak alua asentenshi tulu adoker külen taküm 2016 küm, küm 40 ajungba tenüng nung ayongzükba sentong ka liasü. Iba sentong ya June ka nungi July 3 tashi Life Spring Corner nung liasü aser July 4 nü nungi Dimapur District Sports Council stadium (Public ground nung lidagi. Iba anogo 40 asentenshi sentong ya July 10 Deobar nikongdang 5:00 ako nungi tatembangbuba sentong agia tembangtsü.