Asenoksasa asenok anepalu ashitsüla

Tang ama alima tashidak wara poktetba ya shisabolutsübo tulu saka kecha balaka tesüngmangtsü mali, kechiyong ibai alima nung meimlaba aser matalokdangba ka ataloker masü saka atalokdanga aliba alima lendong ka ajurur. Küm 100 tejakdang, 1918 küm-a alima ajaklen Spanish flu ta ajaba tashidak wara agi nisung million 50 ( crore 5) dak tali asüba otsü tangang asenoki tejangjaba nung jembir. Atangji, asenok dakbo mekongshi saka küm ter jakdanga 2009 küm alima nung swine flu wara agi nisung lakh aika asüba asenoki angashiogo. Item tashidak wara ajakji Covid-19 tashidak wara ama yimrayimshi dang lir saka tashidak tasen asüba agi mozü maka aser anepalutsüa junga memetet ta asüdang anepalu mesütet nisung aika südaktsüogo. Tanüa Spanish flu aser swine flu ama Covid-19 tashidak agi asenok kangshir aser tsübuteper. Atangji, tamalen amato masü tanübo asenokbo tashidak wara nokdangtsü asoshi mozü (vaccine)bo nguteta lir aser covid tashidak nokdangtsü atema kümdanga alitsü atema aser covid agi shirangdang anepalutsüba yimyatema sayur. Aji oda, Covid agi shirangdang achitsü atema yangluba shitakba mozü meliaka, koba mozü kodang aser koma achi nung Covid agi shirangertem ajunger, itemji mozü kidang inyakertemi meteta lir. Ibayongji, aika dak tashidak aliba putetaka, kar dak alaka, aika melamelaa jungogo. Ibaji asenok ajak asoshi osang tajung asütsü. Ashiko, alima nung nisungtem tashitemetet nung ulua küma kodanga masütsü asoshi mozü dena yanglutsü merangaka, ano külen alima kintem rongnung tsükchitep onsara, anungji kati ka den yariteptsü meranger masü saka kati ka alijak nung mali küma samatsütsü bilemer asünungji, asüngbo Covid wara dang nungi tesashiba mopong ajak ya miim akümtsüsa miim tango chioktsüa akok, idangjibo sü agi teni tebang nembangba agibo makoktsü. Iba tashiji bilema tashidak wara tamajung nungi nisungtem peisasa kümzüktsü merangba putuji tanü putu ya lir. Iba ama mapang ka nung, atangji, asenok mozü kidang inyakertem den mozü, oxygen aser shiranger yaridang nüngdakba osettsüset ajak peria alitsü tim. Ajisüaka, asenoki jungjunga bilemdangdi süra, tang ama alima tashidak wara tulu agi nisungtem amokmerendang, mozü kidang yipten, doctor, nurse, mozü, oxygen aser shiranger aser anepalurtem nüngdakba osettem kwika agibo peritsü ? Tia mejungi yimkong shirangadokra aser shiranger ajungaji mozü kidang anepalutsüsa kümra, koda asütsü ? Shiranger ajak nem mozü kidang yipten agütsütettsü na ? Shiranger ajakji reprangtettsüsa mozü kidang doctor aser nurse agi peritsü na ? Shiranger ajak akua Oxygen aliyonga, shibai itemji anepalutsü ? Itemji kodang, matalokia shitakba nung ataloktsü amai shisabolua bilemdangdir, tanü yimten yimsüsür aser medical nung ketdangsertemi Covid agi shiranger yaritsü atema yipten, mozü, oxygen aser inyaker peria renema lir ta yimjak nung sangdongba ya kanga junga mebilemdangi sangdonger ama angatetter, kechiyong tang ama yimkong züoka shirangba tashidak wara asoshi nüngdak peria renemtsübaji takar aser tashitemetetter lima asoshia kanga tasak asütsü. Ibaji kodang asenoki asangsang nung shisadangdir, lenirtemi nübortem dang nenok shirang nunga, kecha shisa tebulu, ajak peria renema lir ta masü, saka asenok ajak shiranga adok nungbo kecha agia meperitsü aser teyarir-a malitsü, anungji meshirangtsü merangang ta ajungshipet ajungshia renemtsütsübajiang nüngdaker. Iba ama tensa tiaji asenok jakdang maruia arutsü ama bilema nübortem ajak pei kibong asoshibo doctor aser nurse akümtsüsa renemtsüba mapangji tang ya lir. Alima tongpang rara nunga nisung tainbo ajak sepai akümtsü training agiba ama, asenoka shiranger anepalutsü inyakyim terabosa angazüktsüla. Tang ama yimkong shirangtepdang, asena taneptsü bushia mozü kidangi aoyonga anepalur teka agi mayimjemtsüa akok, anungji asenoksasa kidang anepalu ashi nungbo ajungtsüba ser nung mozü kidang anepalur agi meperi repranga taküm tembangtsüsa tia dena ajurutsüa akok. Iba jagi yaküm kümbo Covid-19 positive putettertembo ajak mozü kidang yur anepalu saka tangbo pei kidangi odaktsür, kechiyong positive putetter ajak nem mozü kidang yipten magütsütettsü aser anepalurtem agia meperitsü. Iba tensa aser nüngdakji angateta, tanü asenok Covid-19 tashidak wara nungi jenbutsü merangdang, tangar dak dang meimlai mesüra tanga nung dang jenoktsü mebilemi asenoksasa asenoki asenok asen kidang anepalutettsüsa asenok renemtsübajia kanga tongtibang nüngdak ka kümogo.