Asenoksasa yangluba tebilemtsü

Nagaland nung tsünglu maruba agi alu meyimtetba tebilemtsü mali aser anü kanga tsüka apuba agi mapa inyakdak aser kima yimdong nung nisung asüba osang mangashir. Aji oda, asüama aser takoksa tulu ajurutsüsa menoknok manoker, yipru maiter aser tzümetsüng madoker. Ibaji dang masü saka mozü agi menokdangtettsüsa tashidak  tasen aser tamajung poktetba agi nisungtem asüba mali. Ano, ajak atema anisüngzük kaji kibong shia nung sorkar ita sen achir kaka ananabo lir, anungji ita sen kija agia kibong nüngdak peria jangratema litetter. Iba denji ano maparen ajak nung nübortem asoshi center sorkar kübok ministry tapu balala nungi Nagaland nung department balala dangi senotsü, jangotsü aser osettsüset yoker. Aji oda, Nagaland nung alir Naga nungertembo chiyongli mejanga kazüli ta asüyonga tebok sünga chiyonga jema alitsü atemabo India sorkari yokba teyari agi perir anüngtsü. Ajisüaka, alima nung aliba ya chiyongi aru masü saka mapa inyaktsü aru aser chiyongtsü atema mapa inyaker masü saka mapa inyaktsü atema chiyonger. Anungji, asenoki ka asenoksasa tebilemtsü akatsüsa tensa mapang tamajung ka meyanglutetra, alima yimya agibo Tsüngremi Nagaland nung alir Naga nunger timtema shisabolua alitsüsa yangluja mali ta angatetter. Ajisüaka, tanü Nagaland nung asenoksasa asenok timatemtsüsa yangluba tebilemtsütem aika lir aser item rongnung asenoki asenoksasa benjaba yimten tebilemtsü dak alaka ano mapai anioktsü atema tatidang agia shimtetter külen maniokba, ano mapaibo aniok saka ita sen magütsütetba, school tanurtem nem tazüngtsü kaket aser uniform mapang shitak nung magütsütetba, school tanurtem chiyongtsü asoshi jang nung mesen iadoker agütsüba, temulung agüja shitak meinyakba agi tang tashi light peria mengutetba, lenmang junga meyanglutetba aser lanurtem züngzüker mapa angutsüsa kaketreju balala nung merenemtsütetba tebilemtsütem asütsü. Item tebilemtsütem ya anüng nungi aluba tebilemtsütema masü aser Delhi nungi yokba tebilemtsütema masü saka asenok morumorudang asenoksasa asenok timatemtsüsa yanglutetba tebilemtsütem lir. Tanü Kohima nung RMSA sentong ajanga tesayurtem inyaktsü asoshi tatidang agia shim saka mapa magütsüi küm junga atatadaktsüba jakla yimya jagi Nagaland sorkar kübok department balala nung kechikoma ketdangsertemi inyaker, ibaji sayur. RMSA nung inyakertemji RMSA sentong mapa küma inyaktsü asoshi tesayurtem shimtsü aser parnokji kaketreju balalai yoka sayudaktsütsü shim. Ibaji atema parnok nem ita sen dang masü saka taa tapu balala agütsür. Ajisüaka, tesayurtem shimtsü asoshi tatidang agir shimba purtem nema mapa magütsütetra, RMSA office nung tapok aika alitsü südi ta bilemer. Item tapoktem nung jagi tesayur 111 nem agütsütsü yokba ita sen yima oadok asü (?) mesüra Delhi nungiang aibelena peria meyoktet ta bushisüngdangtsübaji kanga tongtibang kümogo. Iba amai asenoki asenoksasa yanglutetba tebilemtsü agi timtem ajurudang, tanü tashi Naga nungertemi kanga junga inyaktsü angazükbaji mapa meinyak aser mapai mao ita sen agitsü mesüra “Adjustment” asüba aser ” Commission” agiba mapatem nungang kanga junga inyakteter ta reprangtetter. Mapai mao ita sen achitsü shimba agi joko nütsüng aser asen akaba den meputep sorkar tenzükertem talila aika shima lir. Ashiko, tangbo nisung ishika nem dang ita sen magütsütetter saka küm ishika sülenbo sorkar tenzüker ajak nem ita sen agütsütsü maka akümtsüa akok. Joko adjustment aser commission agia agia mapa kata shitak meinyaktetter aser Delhi tsüngdang mapa inyakba mesayutet kümogo. Aji oda, lenmang majungba, school ki tejereper alibatem, mozü ki teshinem menema ayuba ajakji asenoki adjust asüba aser commission agibatem lir. Iba ama tia ka nunga ano asenokbo kodaser adjust süa agitsü ? Ni commission kwi angutsü (?) ta bilemba shisatsü nungi tatsükata mepila anogo shia Delhi len repranga amonger. Tanü asenok timatemtsüsa asenoksasa yangluba tebilemtsütem ya CBI telokia makoktsü saka asenoki asenoksasa tarutsü putu meima melenshitsüla.