Dimapur, June 19 (Agencies): Tang tagitak anogo 40 nü asentenshi sentong anogo 15bubanü sentong nung jembidang Let’s Go Ministry missionary, Imtimongba Lemtur-i, “Asen lima nung 1976 küm asentenshi atema asenoki Tsüngrem nem tenüngsang agütsür. Ajisüaka ibaji süadok aser tsünglangleni alu. Iba nung ya Tsüngremer shilem nung kecha tai mali, ajisüaka iba ya Tsüngrem O tesayuba agi anüngba ajanga liasü,” ta metetdaktsü.
Asentenshiba taküm ka maneni alitsü atema sayutsüngir, Imtimongba-i tongtibang onük asem benoka jembi.
Mezüngbuba nung pai, maneni asentenshia alitsü jabiji Temeshiba lir, ta ashi.
“Yisu Khrista dak tajung aika liasü, ajisüaka Pa indang tajungtibaji ‘Pa Temeshi liasü’. Asenoki Yisu agizükba mapang nungjisa Pa dak aketba tajungtemji asenoki shilem ka akumer. Khristan taküm ka nung Temeshibaji alitsüla,” ta paisa metetdaktsü.
“Tsüngremi Temeshi taküm aliba nisung bushir. Temeshibaji Yisu ama kümnüba lir. Tan puto nung Tanela tajabaji ibai lir,” ta paisa ashi.
Asentenshia alitsü atema tanabuba jabiji ajemalu lir, ta pai ashi.
“Ajemaluba ajanga temulungjang meyipdaktsür, aser temelung meyipba ajanga temulung melenshia Tsüngrem dangi meyiptsü telemtetba agidaktsür. Alima aitsütsü atema Tanela Temshi yok. Ajemalu ajanga masükümer mesüra nüngtugu akumtsü memeranger, ajisüaka ajemaluba ajanga kati ka akhümtsübuteper,” ta pai ashi.
“Arogo nung ajemalu lira kati ka meimtepa akhümtsübuteptsü, aser Tsüngrem sentsü wangshidaktsütsü. Ajemalubaji temulungjang tangatetba lir,” ta sayutsüngirisa ashi.
Pai ashiba agi, Mosa ya teyakyak aser tasü tait nisung ka liasü, aser pa ajemaluba nisung liasü, kechiyong pai Tsüngrem dak metalok.
“Na ajemalura nai nü takümji Yisu nem bendanga agütsütsü, kechiyong Yisu medenibo nai kecha meinyaktettsü ta nai jangjatsü,” ta Imtimongba Lemtur-isa metetdaktsü.
Asenshiba aliba taküm kaji aya-tzüraba lir, ta paisa ashi.
“Ayatzüraba medeni asentenshiji kodanga metenzüktsü. Asentenshi ya nisungi yangluba ka masü; asenoki asentenshi metenzüktettsü,” ta pai ashi.
Asentenshi atema asenoki tzüratsüla ta shia Lemtur-i, “Asentenshi ya nija Arogo ka masü, ajisüaka iba ya ajak telongjem ka lir, Tanela Temeshii tanemi lenibaji asenoki angatsü nüngdak. Iba ya ken ka kija masü saka telung nungi ayimtenba ka lir,” ta ashi.
“Nisung jenti Yisu dangi aruba puto ka nung asenok alir. Nisung kati sabang nungi sayutsüngibaji alima nisungtem ajaki television, media aser radio ajanga angur aser angashir. Tsüngremi ajak dak Pa tanela apouktsür kechiyong Tsüngremi mebendanger. Shibaisa Yisu dak amangdir kümzüktsü aser tang mapang ya shinzüka aliba atalokba mapang lir,” ta paisa shisem.
You must be logged in to post a comment Login