Asentenshi sentong balaka !

Asenok mejungi liaka ano tajung kaji asenoki Tsüngrem nungi asentenshi kanga aginür. Iba tetezüji asenok tang taküm libaliro ya kanga majung ta asenoki meteta lir aser melenshiner, ibayongji asentenshi aginür. Asentenshi aginüba tetezüji taküm tejenba agi laakadoker tasen ka aginür. Aji oda, asen lima yimten aser loktiliba ajak teraksa tia nung lir, anungji tajungba küma melenshidaktsüner saka memelenshidaktsütetter. Anungji, Tsüngrem nungi asentenshi milak ka yoknung dang asen taküm, kibong, yimten aser lokti taküm melenshitettsü ta amanger. Iba tamang aser teimla nung asen lima nung lanu tain ajaki asentenshi ka meshia sarasademer. Atangji, asenoki amanga külemba Tsüngrem ya temulungjang agiba Tsüngrem, anungji asenok mejungi liaka Pai asenok temulungjang taroktiba nungi asentenshi ka aginübaji meteta lir. Aji oda, aginer saka mangur ta asüba agi meshir. Iba tangatetba aser teyongyaba nung arogo shia nung küm shia asentenshi sentong akar. Atangji, iba ama sentong nung nisung aika temoatsü angur. Amangba purtem rongnung kar tamang nung tashi meiti ooya alirtem tashi itshir aser ano atsüngzüka oa alirtema tanaben Tsüngrem taochi bushia arur. Ajisüaka, iba ama arogo shiai küm shia ayongzükba asentenshi sentong zütsük agi kümzüktsü nüngdakba purtem aika mambangtetter, kechiyong parnokji sentepi marur. Tanü arogo tsütsü tebilemtsüji aji ka lir. Iba nüngdak aser khuret reprangtetba agi taoba hopta nung asenoki iba osangkaket ajanga, ” Arogo shia nung küm nung khen asentenshi sentong aliba ya tenla ki kilong nung masü saka ajak arutsüsa aser ajaki angashitsüsa moapu nung alinunga koma süla ?” ta bilemdanga shisalemsateptsü merangogo. Atangji, moapu nung asentenshi sentong ayongzüka akatsübaji tasak asünungji makatettsüa akok. Ajisüaka, iba tasüngdangba yagi asenok nem tangatetba ka agütsüner. Ibaji, arogo nunger süaka tenla ki mengudangba nisung aika lir ta shinür. Item jagibo asentenshi sentong aliyonga maliyonga tenla kidangibosa marutsü kechiyong parnokji tenla kidangi marupa. Aji oda, kasa tamangertem rongnunga sentepi aor tamanger aser maor tamanger ta balala lir. Atangji, nisungbo sentepi aortem dang nungibo sentepi maortemjiang tajungba asütsüa akok. Ajisüaka, nisung kisüng ajungba agi meperir  kechiyong tamanger kaji tangar tamangertem dena longjemtsü nüngdaker. Aji oda, pei kisüng amanger ayutsüba masü saka tamangertem longjemer awa oa inyaktsü mapa aika lir. Iba tangatetba nung sentepi marurtem aser mamangertem dena putettsüsa asentenshi sentong ya alinung junger ta bilemer. Aiben asenoki sentepi marurtem asoshibo kanga süoki iabo mebilemtsür. Iba jagi  tenla kidanga aiben sayutsüngirtemi sentepi kodanga marur aser temenen mapatem kecha nungia mepilai alirtem den jembir amai jembir. Ashiko, iba jagi teti sentepi arur, teti lai zünga alir aser teti sarasadema alirtembo temoatsü balaka mangutsüa akok. Kotaki atutsü mesüra molumi aotsübajibo peii metet aser Tsüngremi metet saka sentepi marurtem dang nungbo sentepi arurtem jagisa Tsüngrem tekülemnüba, tenla tagütsünüba aser Tsüngrem aküm tsübunüba shisatsü aser tangatetba lir ta angtetdi. Anungji, item purtem dang nungibo sentepi marurtem asoshiang asentenshi tenüngdakba ta asenoki angatettsü junger. Aji oda, kodaser asentenshi sentong ajanga item purtemji asentenshidaktsütsü ta bilema sentong yanglutsübaji arogo lenirtem asoshi kanga tongtibang lir. Atangji, iba tangatetba aser tebilemba nung arogo nung asentenshi sentong tenzüktsü mapang jelia consellortem jaoka kibong sema odaktsür, anungji iba jagi kar dakbo kongshir. Ajisüaka, akok tashi tanüla teimba anir arutettsüsa aser santem ajak tenla kidangibosa arutettsüsa  asentenshi alidang aser malidang ajak nung amangba purtemi kati ka ajungshia kibok sema jajatsübaji junger aser asentenshi sentong nung nisung ajak sademsadema arua tentettsüsa yanglura, ano ibajisa temoatsüba asütsü.