Asentenshi ya Tsüngrem sentong

– R. Temjen Imsong,
Ex-Pastor, Naga United Village, Dimapur.

Tekümtet ya nisung sentong masü, Tsüngrem sentong. Benny Hinn-i ashi, alima nung sayatenya tulutiba taochiji nisung ka temenen nung temulung meyipaji lir. Ne dak iba Tsüngrem taochi sayatenyaji ajuru asu majuru ?
1.    Asentenshi ya kechi ? Nai koma langzütsü ?
–    Jepa sarasadema tadok meshiba.
–    Pungtena ken atenba.
–    Tanela temeshi-i apuba,
–    Sayatenya mapatem inyakba (Yamala)
2.    Saka asentenshi ya taküm nung temelenshi adokba,
–    Asentenshi ajanga Arogo nung temelenshi adoker.
–    Asentenshi ajanga Lokti nung temelenshi adoker,
–    Asentenshi ajanga Kibong nung temelenshi adoker,
–    Asentenshi ajanga Yimjung adokdaktsür.
–    Asentenshi ajanga shizuka-maoba temoatsütem ni ne nem agutsütsü. T. Mapa. 13:34-35. Asentenshi  adokba ajanga lima tatem tonga tekumtet alitsü. T. Mapa 13:47
3.        Asentenshi ya Yisu agizüka taküm tasen akümba nungi tenzüker, Isaia 57:15. Shiba tanela teraksa aser ajemalu nung lir, tanela tasen kumdaktsütsü.
4.        2 Puti 7:14. Yangi tongtipang o 8 shia lir. Kü nebur, shirnok ku tenung nung ja-a lir ajemaludi sura, sarasademra, ku jak bushira, lenmang tamajung nungi meyipra, kotak nungi angashitsü, temenen adoktsü, aneptsütsü.
5.        Tsüngremi asenok dang kü nebur ta ajatsüsa na temsüa asentenshiogo ma ?
6.        Nisung shia ajemalua Tsüngrem bushira, temelenshi arutsü, temelenshi adokra tali tila kuma ajemalutsü. Yisui ashi, shir ajemalurtem lir, parnok tepelatsü kechiaser parnoki alima senmang amangtsü. Mt. 5:5
7.        Sarasadem ya Tsüngrem den jembiba O, sarasadem ajanga alima anokshidaktsür, alima nung asentenshiba otsütem züngdangra, junga sayutsungiba nungi asentenshi adokba aika mali, saka tanen makai sarasadembi agi asentenshi milak jangruba jenti lir. T. Ken mejemeri yamai ashi:- Mesui ayongtsü yongyaba ama, ni na asoshi yongyar, kü nelai taküm Tsüngrem asoshi tzürar. T. Ken 42:1-2.
8.        Asentenshi ya Tsüngrem temeim tejak bushiba, Tsüngrem nungi pila-a or alirtemi; temulung meyipba tanaben Pa bushira angutsü. Mt. 7:7
9.        Lenmang tamajung nungi meyipra:-
–    Asentenshibo asü, saka akhi jakla yimya memelenshi.
–    Taküm nung temenen mapatem toktsüba maka,
–    Na asentenshiogo ta asüba kuli kecha mali.
(Mt.15:8-9. Yisui ashi, iba  puri tebang agi ni akümtsübur, amajok nung ni külemer.)
10.        Kotak nungi angashitsü, aser tadok agutsütsü:- Alima   meimchir ajak mepishiba angashia aliba Tsüngrem ya tesüngmangtsüka lir. (Majabaji tang takoksa)Tsüngrem bushiba aser tadok anguba makai na asentenshibaji mabensa.
–    2 Timo 3:7. Teti angazüker, saka ochi metetba tangi kodanga marutetba.
11.        Aneptsütsü :- Asentenshi ya lenmang ajaklen tanuptsü anguba, kuli. (Saka tia maka) asentenshi sentong ya tenla ki telung tang tenzüker aser yangji atemer. (Iba yongji)
–    Pei mapa inyakdak Asentenshi maka.
–    Bazaar nung Asentenshi maka.
–    Kima yimdong nung Asentenshi maka.
–    Ainlen senzüdang Asentenshi maka.
–    Kilung nung Asentenshi maka.
–    Kiyonger tsüngta Asentenshi maka.
(asentenshi ta asüba O ya atamata O masü, ya tanela temeshi mapa aser O ya ain)
Tsüngremi pa maneptsü tashi, tadok magutsü tashi, Asentenshi tetezü maka.
12.        Tekemtet asoshi asentenshiba ya Yisu temeim nungi tenzüker, Yisu khrista temeimji anasü nung jungkjai adok,
–    Pai tebu dang meimba,
–    Pai meimchirtem dang meimba.
Yisui alima dang metetdaktsünüba ka dang liasü aji ni kübu dang meimer. Yoh 14:31. Tsüngrem dang meimtsüji kechi aser pa dang koda meimtsüla aji metetnura asentenshiang aser kibuba Yisu khrista nungi angazükang.
Küm ishia suiogo Tsüngrem tenzüker kati asentenshi mapang nung yamai ashi.
–    Asen arogo nung Revival adoktsü atema sarasadem mesüli.
–    Ao lima nung Revival adoktsü asoshi sarasadem mesüli.
–    Naga lima nung Revival adokdakjang ta sarasadem mesüli.
–    Saka Nisung shia kü dak (ni) revival adokdakjang ta lumia sarasademdi. Ne dak asentenshi adoktsübaji kanga tongtipang. (koda?)
13.        Tsüngrem O asenok nem agütsübaji teti alitsü lima renemtsü asoshi agutsü.
Tsüngrem O-i ashir, asenok Tsüngrem chirtem ta tanelai kuli agütsür. Rom 8:16.
Anungji asentenshi ajanga asen lima shiranga aliba aneptsü asoshi nisung shia pei taküm khen meyipa temulungjang bushidi.