Asentenshi ya Tsüngrem Sentong

~ R. Temjen Imsong, Ex. Pastor
Naga United Village, Dimapur.

Tekümtet ya nisung sentong masü, Tsüngrem sentong. Benny Hinni ashi, “Alima nung sayatenya tulutiba taochiji nisung ka temenen nung temulung meyipaji lir”. Ne daka iba Tsüngrem taochi sayatenyaji ajuru asü majuru?
1. Asentenshi ya kechi nai koma langzütsü?
– Jepa sarasadema tadok meshiba.
– Pungtena ken atenba.
– Tanela temeshi-i apuba.
– Sayatenya mapatem inyakba (Yamala)
2. Saka Asentenshi ya taküm nung temelenshi adokba.
Asentenshi ajanga Arogo nung temelenshi adoker.
Asentenshi ajanga Lokti nung temelenshi adoker.
Asentenshi ajang kibong nung temelenshi adoker.
Asentenshi ajanga Yimjung adokdaktsür.
Asentenshi ajanga shizüka-maoba temoatsütem ni ne nem agütsütsü. T. Mapa 13:34-35. Asentenshi adokba ajanga alima tatem tonga tekümtet alitsü. T. Mapa 13:47.
3. Asentenshi ya Yisu agizüka taküm tasen akümba nungi tenzüker, Isaia 57:15. Shiba tanela teraksa aser ajemalu nung lir, tanela tasen kümdaktsütsü.
4. 2 Puti 7:14. Yangi tongtipang O 8 shia lir. Kü nebur, shirnok kü tenüng nung ja-a lir ajemaludi süra, sarasademra, kü jak bushira, lenmang tamajung nungi meyipra, kotak nungi angashitsü. Temenen adoktsü, aneptsütsü.
5. Tsüngremi asenok dang kü nepur ta ajar. Ne dang Tsüngrem nebur ta ajatsüsa temsüa asentenshiogo ma?
6. Nisung shia ajemalua Tsüngrem bushira, temelenshi arutsü, temelenshi adokra tali tila küma ajemalutsü, Yisui ashir shir ajemalurtem lir, parnok tepelatsü kechiaser parnoki alima senmang amangtsü. Mt. 5:5.
7. Sarasadem ya Tsüngrem den jembiba O,
Sarasadem ajanga alima anokshidaktsür,
Alima nung Asentenshiba Otsütem züngdangra junga sayutsüngiba nungi asentenshi adokba aika mali, saka tanen makai sarasademba agi Asentenshi milak jangruba jendi lir.
T. Ken mejemer yamai ashi:- Mesüi ayongtzü yongyaba ama, ni na asoshi yongyar, kü nelai taküm Tsüngrem asoshi tzürar. T. Ken 42:1-2.
8. Asentenshi ya Tsüngrem temeim tejak bushiba. Tsüngrem nungi pila-a or alirtemi, temulung meyipba tanaben pa bushira angutsü. Mt. 7:7.
9. Lenmang tamajung nungi meyipra:-
– Asentenshibo asü, Saka aki jakla yimya memelenshi.
– Tadok meshi, Saka kasa temenenbo inyaker.
– Taküm nung temenen mapatem toktsüba maka,
– Na asentenshiogo ta asüba kuli kecha mali.
(Mt. 15:8-9. Yisui ashi, Iba puri tebang agi ni akhümtsübur, amajok nung ni külemer.)
10. Kotak nungi angashitsü, aser tadok agutsütsü:-
Alima meimchir ajaki mepishiba angashia aliba Tsüngrem ya Tesüngmangtsüka lir.
(Majabaji tang taoksa)
Tsüngrem bushiba aser tadok anguba maki na Asentenshibaji mabensa.
– 2 Timo. 3:7. Teti angazüker, saka ochi metetba tangi kodanga marutetba.
11. Aneptsütsü – Asentenshi ya lenmang ajaklen taneptsü anguba, kuli. (Saka tia maka) Asentenshi sentong ya tenla ki telung tang tenzüker aser yangji atemer. (Iba yongji)
– Pei mapa inyakdak Asentenshi maka.
– Bazaar nung Asentenshi maka,
– Kima yimdong nung Asentenshi maka,
– Ainlen senzüdang Asentenshi maka,
– Kilung nung Asentenshi maka.
– Kiyonger tsüngta Asentenshi maka.
(Asentenshi ta asüba O ya atamata O masü, ya tanela temeshi mapa aser O ya ain)
Tsüngremi maneptsü tashi, Tadok magütsü tashi, Asentenshi tetezü maka.
12. Tekümtet asoshi asentenshiba ya Yisu temeim nungi tenzüker. Yisu Khrista temeimji anasü nung jungkai adok.
– Pai tebu dang meimba,
– Pai meimchirtem dang meimba,
Yisui alima dang metetdaktsüneba ka dang liasü aji ni kübu dang meimer. Yoh 14:31.
Tsüngrem dang meimtsüji kechi aser pa dang koda meimtsüla aji metetnüra asentenshidang aser Kibuba Yisu Khrista nungi angazükang.
Küm ishika süiogo Tsüngrem tenzüker kadi asentenshi mapang nung yamai ashi.
– Asen arogo nung Revival adoktsü atema sarasadem mesüli.
– Ao lima nung Revival adoktsü asoshi sarasadem mesüli.
– Naga lima nung Revival adokjang ta sarasadem mesüli.
– Saka nisung shia kü dak (Ni) Revival adokjang ta lumia sarasademdi. Ne dak asentenshi adoktsübaji kanga tongtipang. (koda?)
Tangar asoshi masü tamasa na asohi sarasademang.
13. Tsüngrem o asenok nem agütsübaji teti alitsü lima renemtsü asoshi agütsü.
Tsüngrem o-i ashir Asenok Tsüngrem chirtem ta tanelai kuli agütsür. Rom 8:16.
Anungji Asentenshi ajanga asen lima shiranga aliba aneptsü asoshi nisung shia pei taküm ken meyipa temulungjang bushidi.