Asentenshi ya yanglushiba aser meyipa reprangshiba mapang

Dimapur, June 09 (TYO) : Faith Church nung Pastor Zhepitoli Roughton-i anogo 40 nü asentenshi sentep nung o jembiba mapang, asentenshi ji asüngsashiba mapang ka lir. Asenoki tanela tasü maginer. Asentenshi ajanga tanela nung asüngsashidaktsür. Asentenshi agi asen yanglushitsür aser tanela yatzüraba tzüra temdaktsür, ta ashi.

“Asentenshi sentong ya aikati nisungi puratetba sentong ka ama agir aser ibaji ajanga akhi sentong ka amadang bilemer. Ajisüaka yamaji masü, ibai Tsüngrem Tanelai aginüba lir. Ya Tanela mapa aser asentenshiji Tanela Temeshi ajanga dak angutsü,” ta nüburtem nem angatetdaktsü.

Tanela Temeshi medenra asenok tashi kija agi merangba ajangbo ibai pelatepa südoksünema amongba sentong ka amai akümtsü. Asen lima nung tamangertemi shitak mamangtetba ajanga teraksa agi süngogo. Arogo tem tsüngda temeimtep aser tamang makatepi kümogo anungji asentenshi kanga nüngdak, ta lia ashi.

1976 küm Nagaland nung asentenshi tulu adoka liasü ajisüaka iba milakji mapang talangka mejangru kechiba süra nisung aikati Tsüngrem taküm o tejangja kanga junga memeteti liasü, ta Pastor Zhepitoli-i ashi.

Tanela tashiji Tsüngrem o den külemi aotsüla, ta lai shisem.

Lai Mathi 5:6 aser Luke 11:9 tekongtem nung shia aliba laitem lemsatepa, “Tsüngremi Tanela Temeshi meküploktsütsü renema lir. Asenok teinyaktsü ajak agi Pa dang meshitsüba dang lir. Meshitsü indang jembidang aikati oset dang bilema arur aser Tanela Temeshi jazüktsü mebilemteter, ta lai ashi.