Asentenshi Yimya – T.Ken 119:88

Ne temeim yimlibilem yari ni rokasoa kümdakjangma. Angji Ne bang ozüng ni bilemtettsü. T.Ken 119:88.
Kodang metsü tsüngküm indang jembir aiktati naro apungba, ozü asaprangba aser rem lanu adokba bilemer. Temesüktep sayutsüngiren nendakba arogoi, metsü mapang bilemdang, tsüngküm den peta asentenshi mapang alitsü bilemer. Asenoki küm shilem ama arogo calendar nung asentenshiba anogoji meinoki chichiba asentenshi rongdak yimya nung rangloktsü bilemtsüla.
Chichiba asentenshiji teloki mejungjai ajangshibaji masü. Iba nung peisasa azüokba aser alima yimya indaktsüba dena lir. Asentenshi nung itemji paidoktsü makok. Chichiba asentenshiji kijai mesüra million kati ajangshitsü akok. Anungji ajaki külemi peisasa azüoktsü aser temenen toktsütsü matateptsüla. Asentenshi kija aser asenok teinyaktsüji agizüktsüba tang.
Ano, tesüiba kümtem nung Khristantemi ajangshia aruba asentenshi ama alitsü bushiba asenoki intoktsüla. Asentenshi shia tanga mapa ama masütsüa akok. Chichiba asentenshiba nung Tsüngremi mapa tasen inyaker.
Shirnoki asenok mapang nung asentenshi adoktsü imlar, iba mapangji tang teka nung lir ta ajang ajanga lir ta sayuba temaitsü lir, anungji renemang!
Itemi shisadangang: Tsüngremi na Nübusen ka asütsü yanglu. Kechi koma Nübusen na asütsüla? Tsüngremi na Nübusen ka asütsü yangluba jakla asem shiang. Nai iba ama nülenji süner asü? Iba nübu akümtsü nai kechi inyaktsüla? Kechiba tang aji meinyaker ?
Sarasadem: Nisung ka süra, pa tanaben alitsü asü? Yob 14:14.
Tenangzükba: Kechiaser ni taküm lir, Pai tanaben taküm alitsü. Yohan 14:19.