Asha Bhosle Oct. 2 sentong nung shilem magiteter

Mumbai, Oct 1, 2015: Ato Kilonser Narendra Modi tongti tesemdanger süa amungtsü aliba, Gandhi Jayanti sentong nung kentener, Asha Bhosle shilem magitettsüsa akümer kechiba süra la ya dang lar jabaso, Hemant sür lepkhu temungdak lir.

Lai, “@narendramodi Pranam: Nü kü jabaso, Hemant süadokba ajanga Delhi nung October 2 nü akatsü aliba, Gandhi Jayanti sentong nung shilem magitettsüsa akümer. Kü dang imlibilema mejashidaktsüner,” ta Brihostibar nü twitter ajanga lemsatepogo.

“Piya tu ab to aaja” ken atenla, Asha aser Daler Mehndi nunger ya ‘India Today Safai Singathon’ nung akatsü aliba Gandhi Jayanti, sentong nung ken ajanga shilem agitsü asoshi lemzüktsür liasü.

Lar jabaso asüba osang angashia Modi-ia la den asüko lemsatepogo.

Pai, “Temeim @ashabhosle, nür jabaso asüba osang angashia kanga nemjema bilemer. Iba tejashi mapang nung ni-a ner kibong den lir,” ta official Twitter ajanga lemsatepogo.

Lar jabaso, Hemant ya Scotland nung cancer agi shiranga asü.