ASHSS Hon jubilee nung T. R Zeliang tongti tesemdanger liasü

Honibarnü Peren nung Chief minister, T.R Zeliang-i All Saint Higher Secondary School indang nüngo kaket sayatsüba noksa nung angur.

Dimapur, November 21 (TYO) : November 21, 2015 nü Nagaland chief minister T. R Zeliang-i Peren nung All Saint Higher Secondary School Hon jubilee mung nung tongti tesemdanger ama shilem agi.

TR Zeliang-i o jembidang mezüng All St. Higher Secondary School tenzükertem aser idakji mapa inyaker ajak nem tenüngsang agütsü.

Mezüngbo Baptist tamanger timba ser aliba tesem nung catholic institution ka lapoktsübaji nübortemi nungnanga liasü, saka iba reju tenzükertemi tila maküm aser parnok alizüng atongtsü merang, ta chief minister-isa ashi.

“All Saint School ajanga district nem konang aika bener arutsüogo aser ketdangser o lennir aika adokogo” ta TR Zeliang-isa shisem.

Paisa kaketshirtem dang pei tajungtiba agüja angazüktsü ayongzük aser tsüraburtem danga pei chirnur nem shisaliok tajungtiba agütsütsü merangtsü tayongzükba agütsü.

Sentong nung Rev Dr James Thoppil Bishop of Kohima, Denis Ilunglung aser Peulu Franky Zeliang, IPS IGP(Hq) nungertemi o tatsütsü jembi aser Sr. Sincy Headmistress ASHHS-i anküp tepela o jembi.

Tanü benjungmung nüngtem nung TR Zeliang-i Golden Jubilee Memorial Block, Golden Jubilee memorial Monolith aser Mini Multi Utility complex lapoktsü.