Ashwin-i ICC Test Cricketer & Cricketer of the Year sempet agizükogo

New Delhi, December 22 (Agencies): India’er all-rounder cricket asayar, Ravichandran Ashwin-i ICC Cricketer of the Year 2016 sempet agizükba sülen nungtugu Sir Garfield Sobers Trophy tanü, Brehostibar nü agizükogo.
Taküm, 2016 küm tangar dak alia, kanga junga asayasang, Ashwin-i Rahul Dravid (2004) aser Sachin Tendulkar (2010) na sülen anidaka, Sir Garfield Sobers Trophy agizüker India asayar 3 buba aser alima ajunga nung cricket asayar 12 buba akümer lir.
Ashwin-isa ICC Test Cricketer of the Year sempeta agizük aser 2004 küm Dravid-i agizükba sülenbo kasa küm nung iba nungtugu sempet anaprongla agizüker India asayar 2 buba kümogo.
Tena dak alaka, Kallis-i 2005 küm, Ponting-i 2006, Sangakkara-i 2012, Clarke-i 2013, Johnson-i 2014 aser Smith-i 2015 küm kasa küm nung nungtugu sempet anaprongla agizüker asayar küma liasü.
Taoba 2015 küm September ita 14 nü nungi tenzüka taküm 2016 küm September ita 20 nü tashi agiba asayar tendangba mapang nung arishi küm 30 tain Chennai nunger Ashwin-i Test asaya 8 tashi nung shilem agidang pai wicket 48 agiba den ajak agi runs 336 tashi agia kanga junga asaya aru.
Ashwin-i Twenty20 Internationals (T20Is) asaya 19 tashi nung shilem agidanga ajak agi wicket 27 tashi takok ngua agiba osang bushitetogo.
Pai alima ajunga nung World No.1 Test bowler jenjang ngua, taoba 2015 küm tembang aser taküm 2016 küma iba jenjang tajungji anaben tashi ajangzüka liasü.