Ashwini Kumar Upadhyay-i Supreme Court nung benokba PIL magizük

New Delhi, July 2 (Agencies): Mongulbarnü Supreme Court-i Nagaland nung Inner Line Permit (ILP) mapa inyakba anema benokba PIL magizük.
Iba PIL nung Centre aser Nagaland sorkartem dang tesem tasentem nung Inner Line Permit (ILP) mebenoktsü aser iba ozüng agientsü atema lenmang bushitsü shia lir.
Advocate aser BJP züngsem Ashwini Kumar Upadhyay-i SC nung PIL ji benoka liasü.
Dimapur nung ILP benokba ajanga non-Naga nungertem taküm, rongsen aser tanga temetentem kümzüka ayutsü atema mapa inyakang ta Upadhyay-i PIL nung ashi.
ILP ozüng ajanga sensotem senzüsenbongba sota ayur aser iba ya Constitution nung Arrla 14, 15, 19 aser 21 alema lir ta paisa PIL nung shia lir.
Ajisüaka, tanü Chief Justice Ranjan Gogoi menden ser tentetba bench-i PIL magizük. Iba bench nung Justice Deepak Gupta aser Justice Aniruddha Bose na dena liasü.
Bengal Eastern Frontier Regulation, 1873 ya British sorkar mapang latetba lir aser iba ya India sensotem district kar nung mesenzütsü atema liasü. Nagaland state Cabinet-i 1873 Regulation ya Dimapur nunga amshitsü telemtetba agiogo, ta IPL nungsa shia lir.
“Iba ajanga Dimapur nung kimung den dokan, godown ama alirtem aser taa agüja aliba non-Naga nungertemi timtem ajurutsü. Local aika non-Naga nunger dang nungi ki taa agiba ajanga sen aazüker” ta Upadhyay-i ashi.
“Nagaland sorkari Gujarati, Rajasthani, Bihari, Jharkhandi, Bengali, Gorkha, Bodo, Dimasa, Karbi, Garo aser ano tangartem ajak bendangertem ta züngshir, aser iba ya kin bendanga amshiba inyakyim ka lir” ta paisa PIL nung shia lir.
“Nisung temeyoktep aliba Dimapur jila nung shishilembar aika pei dokan/shishilembaba shibanger ogo. Dimapur ya kodanga Naga Hills nung dena maliasü anungji Hill tribes atema dang mekümdaktsütsüla” ta paisa ashi.
“Nagaland state akümdang Dimapur ya Assam kübok liasü aser Naga Hills o Sixth Schedule nung maden. Saka Sixth Schedule nung medenaka kodaser Nagaland state nung Dimapur dendaktsü’ar memetet” ta Upadhyay-isa PIL nungsa shia lir.
Tanü SC Bench-i oshidang agütsür senden tembangtsü lia Upadhyay-i PIL meyipa agitsü aser bangdak ministry ka dangi abentsü asüngdang saka okadaki ibajia memolung.
Nagaland nung Hindu nütsüng yongsük 8% dang lir aser ILP bener ang state telungi aitsübaji Constitution alema lir. Journalist temia ILP bener ang aitsüsa akümer, ta Upadhyay-i SC bench dang ashi.
Ajisüaka, SC bench-i PIL meyipa agitsüba onükji magizük aser “Tang nai journalist tem indang teyari bushitsü meranger” ta telangzüba agütsü.
NSF-i pelar; Tenüngsang agütsür
Tanü Chief Justice Ranjan Gogoi, Justice Deepak Gupta aser Justice Aniruddha Bose nungertem indang bench-i Ashwini Kumar Upadhya-i benokba PIL magizükba osang angashia kanga pelar ta Naga Students Federation (NSF)-i metetdaktsü.
Nagaland Deputy Chief Minister Y. Patton aser Advocate General, Govt. of Nagaland K N Balgopal nati iba PIL magizüktsü atema mapa inyakba atema pelar.
Ashwini Kumar Upadhya-i tamagitsü PIL ka ajanga Supreme Court anisatsü merangba aitsür aser pai mebilemdangi inyakba ajanga Naga nunger petsaprongdaktsügo. Anungji, NSF-i pa nem tatok magütsütsü. Tashi balalai Naga loktiliba nung mepetmesü adokdaktsütsü atema meranger aser iba nung PIL benokba ya ka lir, saka tatem nung nübortem taginübai takok angutsü, ta NSF-isa metetdaktsü.