Asia Bibi posemtsüla

Taoba hopta Pakistan Supreme Court-i Khristan tamanger Asia Bibi tai mali ta metentsüba obendangji Pakistan sorkar atema tsüngrem mezüngmeshiba dak sendakba ozüngtem melenshitsü maongka tajung ka liasü, saka meyiper iba ajanga Prime Minister Imran Khan-i aniba sorkar atema ang khuret tuluba ka bentsür aruogo. Taoba Bodbarnü Supreme Court-i Asia Bibi metentsü saka Muslim nunger tali bilemloka oa amangertemi iba obendang magizüki anogo asemnü tashi Islamabad nung gari lenmangtem mokdanger lungkak ait. Muslim nunger putir aser Islamist party- Tehreek-e-Labbaik mendenbuba Khadim Hussain Rizvi-i sorkar den tenangzüktep ka agiba sülen ang parnoki lungkak aitba anen. Bibi metentsüba anema Supreme Court nung review petition ka benokba nung sorkari tenokdangba magütsütsü ta tenangzükba agiba nung onük ka benoka lir. Sorkarisa lungkak aitertem dang Bibi Pakistan adena meyoktsü nangzük. Pakistan sorkari tang agi tanabenbuba Rizvi aser par Islamists-i rongshiba tsüngdang apudakogo. Yaküm, electoral laws nung temelenshi ka bener arutsü merangba anema Rizvi-i anir nisungtemi Islamabad tezülen hopta aika lungkak ait. Candidate temi tezüngzüktep agiba melenshibaji tsüngrem mezüngmeshiba den kasa ta lungkak aitertemi ashi. Parnok hopta asem shi lungkak aitba sülen taoba Pakistan sorkar aser mitkartemi Islamist nunger den tekong merangtepba anentsü lemtet. Sorkari akhi ama tezüngzüngtep agiba meyipa bener aru aser iba asoshi Law Minister mapa nungi anentsü. Pakistan sorkari kobika tali bilemoka oa mapa inyakba teloktem nem parnok anishidaktsütsü aser asalentongtem yangludaktsütsü ta alimai tenük yoka reprangdar. Muslim nunger tali bilemloka oa amangertemi Pakistan sorkar ketdangsübaren madak mapa inyaka arur aser iba ya par linük atema dang masü saka temeket aliba linüktem aser alima atema majung. Asia Bibi indang ken o atema Pakistan nung azü aika tokshiogo. June 2009 nung lai Muslim nunger külem mapa inyakertem den obang meputepi toktepdang Islam aser Prophet Mohammed mezüngmeshi ta tai tongloktsü aser iba atema la pur tepuokdak ayu. 2010 küm local okadak kati lai tsüngrem mezüngmeshi ta aitsü aser tasüba temerenshi agütsütsü oshidang agütsü. Iba oshidangji Lahore High Court-ia posema nungit. Ajisüaka, alimai Asia Bibi ken o atema ola adok. Tsüngrem mezüngmeshiba ozüngtem amer Pakistan nung nübo agi tangar memenepba tamangba yimsü amangertem reshikangshir ta alimai tai tongloktsü. Punjab nung Governor Salman Taseer-i Bibi chiokang ta mepishiba mapa ketdangsüa inyak saka 2011 küm par bodyguard-i pa khaset. Kasa küm, taoba Minister for Minorities Shahbaz Bhatti-i tsüngrem mezüngmeshiba ozüngtem yanglushitsü atema ayongzük saka pa-a khaset. Bibi metentsüba ajanga Supreme Court-i ashishitep aketba tsüngrem mezüngshiba ozüng anema noktakertem nem tashi tasen agütsü. Mezüngbo sorkari lungkak aitba azüoktsü merang saka Muslim nunger tali bilemloka oa amangertemi ashiba angaa tenangzüktep agiba ajanga Pakistan sorkari teinyaktsü shitak meinyaktetba dang masü saka Pakistan nung talila bilemloka oa amangertem ang temulung tali uludaktsüogo. Metensür, Asia Bibi atema jembitsür lawyer Saiful Mulook-i pa taküm lendongbang nung lir ta shia Pakistan toktsür Netherlands nung oa jenokogo. Anungji Islamist nungertemi okadak ken o benoka angadangdang joko Bibi atema jembitsür malitsü südi ta sasa bilemer. Taoba mapang alimai aser lennirtemi Asia Bibi posema ola adok aser Pakistan sorkar rongshiyonga aru, anungji maneni kasa tangatetba nung Bibi chioktsü atema aser lar kibong lendong nungi jenbua alitsü atema Pakistan sorkari mapa inyakang ta takhangba agüja rongshitsüla. Talisa, taoba hopta Pakistan nung Khristantemi Asia Bibi atema sarasademjang ta alima dang mepishia metetdaktsüogo, anungji tangar toktsür Khristantemi la atema sarasademtsütsüla aser Tsüngrem sayatenya jungkai adoka sayua la iba khuret nungi anitetang ta asenoki Pa dang mepia la posema nungittsüla.