Asia Cup tang tashi Dubai nung shibanga lir

New Delhi, Mongputeni/Oct. 10 (Agencies): Asian Cricket Council tekolakba Mohsin Naqvi ket nungi India-i agizüktsü memulungba yong Asia Cup tang tashi ACC indang Dubai headquarters nung yua lir aser Chairman temelaba makai mebelentsü mesüra magütsütsü totuyuba agüja lir.

Sempet agütsüba sentong nungi iba marok ya bener Naqvi ayazüka aoba sülen marok ya tang tashi ACC office nung lir.

Ibai Indian team-i pa ket nungi agizüktsü memulungba yong lir.

Naqvi ya Pakistan Cricket Board (PCB) Chairman aser par linük nung Interior Minister lir, aser Pahalgam nung kiralongrar temi amakba sülen India-Pakistan tsüngta mangatettep tali akum.

“Tanü tashi trophy ya Dubai nung ACC offices nung lir aser pa nungi temelaba makai mesüra pa melie mebelentsü mesüra magütsütsü Naqvi nungi totuyuba tejangja agüja lir,” ta osang ka ajanga ashi.

“Kodang südir Indian team mesüra BCCI nem pai dang iba trophy amoktsütsü ta Naqvi-i teinyaktsü tejangja agüja lir,” ta osang ajanga ashi.

Naqvi-i pa indang social media sapang nung yimtenren tsütsü sangdong balala agüja arur.

Pa trophy den ayazüka aoba asoshi BCCI mepelar aser iba ken o taruba ita ICC senden nung benoktsü telemtetba agiogo.

“Iba yagi PCB mesüra Naqvi atema tarutsü nung timtem alitsü ama ajiteter, kechiaser Indian team nem trophy ya pai agütsütsü ta tekong meranga nokdaker aser iba asayamung ayonger BCCI dangi yoktsüa memulunger,” ta osang ajanga ashi.