Asia linük 3-i par tzüyim kümzüka ayutsü nangzükteper

(Abelen nungi achijileni tarensena) Indonesian Armed Forces Chief, Gen. Gatot Nurmantyo; Malaysia mitkar lenisang, Gen. Zulkifeli Mohd. Zin; Malaysia Foreign Minister, Anifah Aman; Indonesia Tir, Joko Widodo; Indonesia Foreign Minister, Retno Marsudi; Philippine Foreign Minister, Jose Rene Almendras aser Philippine Navy Chief, Rear Adm. Caesar C. Taccad, nungeri Indonesia kübok Yogyakarta yimti nung senden amenba jakdang ajurutepa sensak asemba noksa ka yangi angur. (Yogyakarta, May 05)

Yogyakarta, May 05 (Agencies): Indonesia, Malaysia aser Philippines nunger densemba Asia anüdoklen tentetba linük 3-i aroki lungjemer par tzüyim kümzüka ayutsü tezüngzüktep ka tanü, Brehostibar nü agiogo.
Philippine anülulentip tsütsülen tesep tentetba Abu Sayyaf kiralongrartemi bendangertem densema, tzüyim nung senzüsenpongertem tashiyim agi pua parnok chioktsü melena sen akhangtsü tenzükba sülen tan linük asemi par tzüyim shilem kiralongrartem nungi kümzüka ayutsü tezüngzüktepji Indonesia kübok Yogyakarta yimti nung agir lir.
Sulu aser Celebes tzüyim nung Indonesia, Malaysia aser Philippines nunger tzüyim arrtsü tenteta lir aser iba tzüyim shilem ajangdanga kümshi osettsüset ton million 55 shi aser nisunga million 18 shi ajangdanga aoba osang bushiteta lir.
“Ozü linük asem tsüngda densemba tzüyim nung kiralongrar aser ozüng alema inyakertemi tashiyim agi rakzükraktemba, nisung tashiyim agi apuba aser iba amala ozüng alemba maparen kanga sashia inyakba kuli ngua lir aser kasaji menokdangra, ozü region nung shishilembatsü jenjang kanga mejungi akümtsü,” ta Indonesia Foreign Minister, Retno Marsudi-i osang jangjashitsü.
Aji oda, par linük asemi lendong tsüngdong atalokdang osangtsüsang lemsateptsü, senzüsenponger aser rongtem nem nungdakba teyari agütsütsü aser kiralongrar aser ozüng alema inyaker den sentakba miim osangtem lemsateptsü nangzüktepogo.
Abu Sayyaf teloki yaküm, 2015 küm March ita nungi tenzüka tashiyim agi pua ayur Indonesia nunger nisung 10 tashi  chioker anogo ishika lir külen linük asemi tan tezüngzüktepji agir lir.