Asia nung ochimeshitiba linükji India linük lir: Forbes

New Delhi, September 01 (Agencies): Tawa Transparency International (TI) teloki survey ka agiba ajanga bushitetba agi, tang India sorkari ashi ama linük nung ochimashi jenti lir.
Transparency International ajangasa, süpokrem amshiba dak sendakba nung Asia nung ochimeshitiba linükji India lir, iba sülen Vietnam, Thailand, Pakistan aser Myanmar linüktem lir.
Iba survey ya Forbes ajanga sangdonga liasü; iba ocet ajanga India nung süpokrem rate ji 69 tashi lir, ta metetdaktsü.
“Telangzüba agütsür rongnung shilem 50 dak nungi tali ibo India nung public services 6- school, hospital, ID documents, police aser utility services nung süpokrem agütsütsüsa akum,” ta telangzüba agütsü.
Kasa ocet nung Ato kilonser, Narendra Modi-i ochimashi anema raraba atema tenüngsang agütsü.
“Ajisüaka Ato kilonser, Narendra Modi-i ochimashi anema raraba nung takok ngudar: telangzüba agütsür shilem 53-ibo Modi-i junga inyakdar ta bilemer. Aser ibaji ajanga nüburtem nem tashi agütsüogo, kechiyong telangzüba agütsür shilem 63-ibo, nüburtemi temelenshi bener arutsütsü ta bilemer,” ta kasa ocet nungjisa zülua lir.
Süpokrem amshiba dak sendakba nung India sülen tanabuba jenjang nung Vietnam lir aser jenjang 4buba nung Pakistan lir.
Survey ajanga bushitetba agi, “Pakistan nung telangzüba agütsür shilem 75-ibo police ajak ochimashi ama bilemer. Police aser court den inyaktsüsa tensa ajururtem nisung ter nungi nisung tenet-ibo süpokrem agütsütsüsa tensa ajurur, ta langzü.
Transparency International-i ita 18 tashi iba survey agidang Asia Pacific kübok linük 16 nungi nisung 20,000 den jembia liasü.
Germany yimtiba, Berlin nung amenoka aliba ochimashi bushisüngdangba teloki yaküma Corruption Perception Index nung linük 168 nungi India jenjang 76 nung adokja liasü.
March, 2017 kasa telok ajanga ashiba agi, Pakistan nung law aser order institutions nung nüburtem dang süpokrem kanga meshir, India nung police-i süpokrem agiba rate ji shilem 54 lir saka China nungbo police-i süpokrem agiba rate ji shilem 12 dang lir.