Asia nungi India nunger lanur kati Google Community Impact Award angu

New Delhi, July 21 (Agencies): Chennai nung azünger arishi küm 14 tain, Advay Ramesh-i angopurtem kümzüka alitsü aser parnok mapa nung tali takok ngua inyaktetsü atema oset ka yanglutetba atema Asia rangben nungi pai Google Community Impact Award agizükogo, ta Google India-i metetdaktsü.
Class 10 nung azünger Ramesh ya Google scholarship sen dollar 50,000 atema shimteta aliba nisung 20 rongnunga densema lir.
“Google Community Impact Award anguba ajanga ni kanga ajungmesor. Iba sempet anguba ajanga ni shisatsü tali bushisemba aser kü tebilembatem tali renlokdakba tsütsü yaritsü,” ta Ramesh-i sangdong ka ajanga ashi.
Ramesh-i yanglutetba “FishErmen Lifeline Terminal (FELT)” yagi Standard Position Services (SPS) amshia Indian Regional Navigation Satellite System ajanga angopurtem kümzüka alitsü aser parnok mapa nung tali takok ngudaktsüba nung yaritsü.
“Rameswaram, Tamil Nadu nungi angopurtem tzüyim nung timtemba ni osangkaket aika nung züngshiogo. Parnok mapaji tzüyim nung mapang talanglang ango pua jajaba ya lir. Khen khenbo parnoki tzü arr ajanga oa ango apuba agi Sri Lanka nunger security temi puer aoer. Iba oset yangi angopurtemi nüngdangba osang angutsütsü aser ibaji ajanga parnok lendong aika nungi kümzüktsü,” ta Ramesh-i pa project terasa agütsüba nung shia lir.
Iba sempet atema alima tesem balala nungi project aika aru ajisüaka Google-i 100 dang shimtet aser item rongnungji India tesem balala nung aliba kaketshir 14 indang project tema densema liasü.