Asia-Pacific linük 15 nung ‘Pokemon Go’ tenzükogo

Bangkok, August 07 (Agencies): Mapang talangka nungi kanga yongyaa aliba reality game “Pokemon Go” Honibarnü Thailand densema Asia-Pacific linük 15 nung tenzükogo.
“Asia nung linük tasen 15 nung games asayartemi tangbo Android Play Store mesüra Apple App Store nungi Pokemon Go download sütettsü,” ta Game Developer, Niantic-i sangdong ka ajanga metetdaktsüogo.
Honibar nü iba game tenzükba linüktemji Thailand, Brunei, Cambodia, Indonesia, Laos, Malaysia, Philippines, Singapore, Vietnam, Taiwan, Papua New Guinea, Fiji, Solomon Islands, Federated States of Micronesia aser Palau lir.
Game asayar tesem metettsü atema GPS amshir
Thailand nung iba game tenzükba sülen ketdangsertemi tebilemba balala lemsatepogo, ta Bangkok Post ajanga ashi.
Tamalen Information & Communication Technology Ministry (ICT)-i, iba game asayatsü atema ozüng kar yanglutsü bilemdar, ta shia liasü.
Ajisüaka Tourism Ministry-ibo, raliwalirtemi linük semdangtsü ajungmesotsü atema game developer nem tesem kar agütsütsü bilemdar, ta ashi.
Ano külen Culture Ministry-i, asayartemi kanga süoki ia asayadang asayartemi meteta mesüra memeti akhi mapang tesemtem raksatsütsü akok, ta ashi.
Iba dak sentakba nung Culture Ministry-i Information & Communication Technology Ministry nem shidi ka agütsütsü ta shiogo, ta Bangkok Post osang ajangasa metetdaktsü.