Asian Boxing: Manoj Kumar quarterfinal-i iogo

Bangkok, August 31 (Agencies): Taoba Commonwealth Games gold-medallist, Manoj Kumar-i Nepal nunger Deepak Shrestha madak takok anguba sülen tang Bangkok nung tasayadak Asian Boxing Championships tebur temang touzük seret 64 taret shilem indang quarterfinal asayatsü jenjang tanü Hombar nü ajangzükogo.
Manoj-i tanü points 3-0 agi Shrestha madak takok ngua iba jenjang tajungji ajangzük.
Manoj den külemi, India nunger tsüngteper 2, Madan Lal aser Kuldeep Singh natia takok ngua tsüngtepba sülen quarterfinal nung shilem agitsü jenjang ngua liasü.
Madan-i points 3-0 agi Iraq nunger Murtadha Al-Sudani madak takok ngua tebur temang touzük seret 52 taret shilem quarterfinal asayatsü jenjang angu aser Kuldeep-ia points 3-0 agi China nunger Aolin Zhang temang touzük seret 81 taret shilem nung tsükdaktsü.
Tanü takok angubaji densema, India nunger tsüngteper 8 tashi quarterfinal nung shilem agitsü jenjang ngua lir.
Asian Boxing Championships ya taküm October ita Doha nung asayatsü ayongba World Championships nung shilem agitsü asoshi ayongba qualifying asayamong lir.
Ano, World Championships asayamongjia taruba 2016 küm Brazil kübok Rio de Janeiro yimti nung asyatsü ayongba Olympics asayamong asoshi ayongba qualifying asayamong mezüngbuba lir.