Asian Champions: India’er hockey teloki China tsükdaktsü

Kuantan, October 26 (Agencies): India’er tebur hockey teloki goal 9-0 agi China madak takok ngua, tang tasayadak 4 buba Asian Champoins Trophy hockey asayamong round-robin league asaya nung yashi, Mongolbar nü shilem agiogo.
Akashdeep Singh, Yousuf Affan aser Jasjit Singh Kullar nungeri goal anana agütsüba densema, India teloki goal 9-0 agi China den temaba jenjang anguba sülen taoba asaya nung Japan telok madak takok anguba ama, goal 10 tashi agütsütsü alizüng ajangzüktsü meranga asayadang asaya tembanga liasü.
India captain, Rupinder Pal Singh, Nikkin Thimmaiah aser Lalit Upadhyay nungeria yashi asaya nung goal kaka agüja, par India telok tan asayamong asaya 4 nung ajak agi points 10 ajangzüker telok kümdaktsü.
India teloki tatembangba round-robin league asaya Malaysia telok den asayatsü lemzüka lir aser iba asaya nung takok angur telok round-robin league nung points timtiba ajangzüker telok akümtsü.
Malaysia telokia asaya 3 tashi atonga akokba sülen ajak agi points 9 tashi ajangzüka, India point 1 agi memenepi lir.
Ano külen, India’er tetsür Junior telokia goal 3-2 agi Spain telok madak takok ngua, Spain kübok Valencia nung tasayadak 5-Nation Invitational Hockey Tournament nung tanü, Bodbar nü shilem agiba osang angazükogo.
India tsürtemi par taruba asaya Germany tsürtem den tan October ita 27 nü asayatsü lemzüka lir.