Asif taküm piyong puoktsü latetja aliba meyipteptsür

Islamabad, Aami 01 (Agencies) : PML-N lennir aser taoba Foreign Minister, Khawaja Asif shiba taküm piyong nübur tenzükba wadang nung shilem magitsü atema Islamabad High Court (IHC)-i latettsür liasü, iba ozüngji tanü Rogonü Pakistan Supreme Court-i meyiptepa latetshitsüogo.
Mr Asif-i temepishiba ken o ka benokba angadanger külen Justice Umar Ata Bandial tekolak ser nisung asemi akümba bench kati iba telemtetbaji metetdaktsü.
Dawn osangkaket den jembidang Mr Asif indang senior counsel, Munir A. Malik-i iba osangji tejabgja ta shiogo.
“Aruya aliba election nung Khawaja Asif-i tokteptsü akok,” ta paisa metetdaktsü.
Linük temzüng nung shia aliba ama mesüi Asif-i ochimashi inyakogo ta shia taoba Rongchii/April 26 nü nisung asemi akümba ‘special bench’ kati pa aitsü kechiaser pai ‘nomination papers’ nung ‘foreign employment’ indang züluja maliasü; ano pa akaba rongsen mesüra senotsü anguba lenmangtem indanga shia mali.
2013 general election nung tokteptsüa pa temsüa maliasü, ta parnokisa ibamapang metetdaktsü.
Aji oda süaka, ‘nomination papers’ nung nüngdakba item ajakji pai shiogo, ta Malik-i Asif metenja nokdak.
Paisa ashiba agi, parliament nung tekolak purtem nembo yamala mesükba temerenshiji magütsütsüla.