ASJU puri ozüng ajanga temeden bushitsü

Guwahati, April 23 (Agencies): All India United Democratic Front (AIUDF) nung tekolakba, Badruddin Ajmal-i ashiba agi, Assam State Jamiat Ulama (ASJU) puri Supreme Court-i tawa national register of citizens (NRC) nung züngsemtsü asoshi kuli kaket meshiba rongnung ‘ration card’ magizüktsü tetuyuba agütsüba sülen tebilemtsü adokbatem benteta ayutsü asoshi ozüng alema moi tanga lenmang ka bushitsü.
Ajmal ya Dhubri nungi MP lir aser pa ano ASJU nunga tir lir. SC-i NRC atema ration crad magizüktsü tetuyuba agütsüba, vote agütsüba, bendanger atema ‘detention camp’ tem aser kuli kaket tejangja makai linüki arua alirtem dak sendakba nung ken o tem asadanga Honibarnü ASJU pur anogo tepeyong senden ka mena liasü.
Tawa Guwahati High Court-ia NRC dak sendakba nung talidak tesem jangjashitsü asoshi kuli kaket meshiba rongnung ‘gram panchayat certificates’ magizüktsü telemtetba agütsüba sülen SC-i iba telemtetba agüja liasü.
Tejangja lisopurtem shirnoki parnok NRC form agütsüdang ‘ration card’ agütsüogo, parnok NRC nung mezüngtoktsü ta, AIUDF aser ASJU na prongla tebilemtsü akar. NRC yangluba inyakyim talangka inyaka oadoker lia iba tetuyuba agütsüba ajanga parnok tali shisabulur. State nung NRC inyakyim 2017 December tashi nungbo tembangtsü asoshi tetuyuba agüja lir.
“NRC inyakyim ya telatet inyakyim ka dak ajemdaker inyaker, koba nung ration card dena kuli kaket kar agütsütsü asoshi nüngdaker. Iba dak ajemdaker tang tashi inyaka aruogo anungji onok tir-i NRC nungi chichiba lisopurtem mezüngdoktsü mechi nung ozüng ajanga temeden bushitsü asoshi tetuyuba agütsüogo,” ta ASJU secretary, Maulana Fazlul Karim Quasimi-i ashi.
AIUDF lenirtemi ashiba agi, iba tetuyuba tetenzük nungi agütsü nungbo nüburtem atema tajungba süla.