ASLB 4 buba Convocation May 5 nung agitsü

Dimapur, April 17 (TYO): Ao Senden Literature Board indang 4 buba Convocation May 5, 2017 nü Town Hall, Mokokchung nung agitsü.
Iba sentong ya anepdang 10:00 ako nung tenzüktsü aser o jembirji Clark Theological College (CTC) Aolijen Principal, Rev. Dr. Mar Pongen asütsü, ta Chairman, Prof. A Lanunungsang aser Secretary, I. Temjen Tzudir nati sangdong ka nung metetdaktsü.
Ao Senden Literature Board-i acha-ayanga agiba Arangtet Tatidang kübok Post Graduate Diploma (PGD) kaketshir 11 aser B.A (Diploma) kaketshir 80 nem kulikakettem agütsütsü.
Maneni, iba sentong nung Ao oshi ajungketba aser renlokdaktsüba atema mapa inyakba ajiteta nisung 17 nem Commendation Certificate agütsütsü.
ASLB-i tatidang balala agiba nung Ao subject nung toppers nem Certificate of Honor den külemi sen 5000 senpet agütsütsü.
Samaro kentenertemi Music Ministry tenzükba sülen 2017 nung küm 25 abensar aser iba nüngtem nung parnok nema sen 5000 senpet agütsütsü, ta ASLB sangdong nungsa metetdaktsü.
Jemtimenba Mollier Foundation (JMF)-i toppers aser Samaro telok nem senpet agütsütsü aser iba maparen ya lanurtem ajungmesotsü atema maneni inyaktsü, ta ASLB-isa shisem.