ASLB-i Ao oshi zülumen jangjashiyim sentong ka ayongzüka agi

Mokokchung, June 01 (TYO): Ao Senden Literature Board (ASLB)-i ayongzüka Ao oshi zülumen (spelling) jangjashiyim sentong ka yangi Süngkomen Baptist Arogo tenla kidang takok ngua kaogo. Iba sentong nung Mokokchung Town Baptist Churches Mission (MTBCM) kübok arogo ter (10) nungi toklang tenzüker, Sunday School tesayur, arogo shia nungi osang kaket zülurtem aser ASLB züngsemtem densema liasü.

Iba sentong nung onük jembir ASLB mendenbuba Prof. Lanunungsangi jembidang, Aor arok senmang ka lir aser ibaji Ao oshi ya lir, ta metetdaktsü.

Paisa Ao oshioben aser kaketkeno jenjang indang kar ashidang, tang ya Ao oshi shirangba mapang ka lir, Aori joko Ao oshi sapua mejembir, mangateter, mesayur aser mezülur, ta ashi. Anungji, arogoi anir tekülem sentep ajak nung Ao oshi agi dang sayutsüla/angazükdaktsütsüla aser ajaki Laishiba olaosü shitak amshia züngtettsüla, ta tayongzükba ka agütsü.

Arogo ajaki oshioben aser kaketkeno jenjang ajungkettsü asoshi maparen balala achayanga inyaktsüla. Tanü joko arogotem nung literature committee alitsü nüngdak aser iba dak sentakba nung rizünga ayuba mapa (archives) aser kaketjen renlokdaktsütsüla. Sept 8 ya “International World Literacy Day” lir, anungji, arogoi iba nüngtem nung sentong kar ayongzüka aka nunga kanga ajungtsü, ta paisa tebilemba ka lemsatep.

Oshioben aser kaketkeno renloktsü atema arogoi achayanga mapang shia kaket züluba maparen dak sentakba nung shisatokden sentong balala ayongzükba den lanurtem atema writers club amala tenzüktsütsü nüngdakbatem paisa ashi. Maparen balala ajanga Ao oshi renloka asentenshi adokdaktsütsü asoshi paisa tayongzükba agütsü.

T.Senka Aoi jembidang, Ao oshi nung tebilemtsü tapu aika ajurubaji tongtibangsa asenok meyong ozülu (script) temeja makaba ajanga lir ta ashi. Tang asenoki amshiba ya tangar indang ozülu amshir, aji asünung, Ao oshi ola adokba ajakbo iba jagi mayimjemer, ta ashi.

Paisa tang Ao oshi zülumen nung liromedema amshitsü asoshi tetuyuba balala bener arua tesentepertem ayongzüka liasü.

Sentong nung MTBCM tir T. Mangyang (Pastor), ASLB tezülur Temjen Tzüdir, ASLB züngsem Rev. L.T Maja aser Y. Lanu Imchen nungertemia shilem agia jembi.