ASLB-i Ao tesayurtem asoshi Orülem aser Olem angazükyim sentong ka katsü

ASLB-i Ao tesayurtem asoshi Orülem aser Olem angazükyim sentong ka Ongpangkong Salang nung takok ngua ayongzüka katsür külen shisalen sayurtem den shilem agirtem külemi tangokba noksa nung angur. Mokokchung, March 12, 2019     

Mokokchung, March 12 (TYO): Ao Senden Literature Board (ASLB)-i ayonga Ao tesayurtem asoshi “Orülem aser Olem” (Ao Grammar kaket) angazükshiyim sentong ka March 12 nü Ongpangkong Salang Arkong Ward, Mokokchung nung takok ngua katsüogo. Iba sentong nung Mokokchung district kübok jila aser yimtsüng balala nungi Govt. aser Private school-tem nungi Ao tesayur noklang jungnüa adenshia shilem agia denogo.
Tanü iba sentong nung Mokokchung District Education Officer, Satemkalai mapang tatsüka agia tajungshi o jembidang, “oshi samara kin ka ayak tesama, oshi ka ajanga dang kin ka ayakji sayur”, anungji, kibong nungi tenzüka lokti balala balala ajaki pei tetsü oshi renlokdaktsütsü merangtsüla, ta ayongzüka liasü.
Bendanger oshi aika ashibaji tajung saka pei tetsü meshira aji maksü lir, anungji, pei tetsü oshi wazüka ayutsü asoshi akhümtsübua aser meima jembitsüla, azüngtsüla aser zülutettsüla, ta laisa inyakdaktsünüba olen ka ashi.
Tanü Ao oshi nung osang kaket ana tashi adoktetba ya Ao kin asoshi temaotsü lir, anungji, ajaki item osang kakettemji tajungba renloka aotsü asoshi azüngtsüla aser akokba tashi shilem agia nungittsü asoshi laisa ajungshia liasü.
ASLB-i Ao oshioben aser kaketkeno renlokba nung shilem tajung agiba asoshia pelaba den ano university tashi nung Ao oshi züngtettsüsa mapa inyakdaktsünür, ta laisa tebilemba ka lemsatep.
Tesayurtemji linük yangertem lir, nenoki angazükbatemji tarutsü putu asoshi lir, anungji, tesayur ajaki nentaka angazüker tanurtem dang tajungtiba sayutsü asoshi laisa ajungshia liasü.
Iba sentong nung shisalen sayur Dr. Pangersenla Wallingi “Orülem Rajem” indang jembia liasü. Tanabuba shisalen sayur ASLB Tongti Zülur, I.Temjen Tzüdiri ajaki zülumen lirumedema zülutsü tasa balala agütsü aser tasembuba shisalen sayur Dr. Lanurenlai “Zülu Yayim” onük nung ajemdaker kaketkeno aser kenshioshiren koma zülutsü ta asüba indang tasa balala lemsatepa liasü.
Sentong nung ASLB Acting Chairman Dr. L. Temjen Jamir, ASLB züngsem Toshisangla Jamir aser ASLB züngsem Sashimeren parnokia shilem balala agia liasü.