ASLB Zonizüng (Calendar) ratet sangdong

Ao Senden Literature Board-i asadanga aru nung asen kini ita aser hopta ka nung anogo tenet züngya ya yimtsüng aser tzükong balalai tenüng balala jayaba angateta, nisung aika nungi shisa agidanger tang koba Zonizüng adoka agütsür ibai Ao Senden temelaba agir adoktsür. Anungji pei yimer aser tzükong nung jayaba ama kar mesüi liaka ibai ajak lirumedemtsü asoshi, ta angatetdaktsünür. Iba Zonizüng aser hopta nung anogo tenet züngyaji tang nungibo ajaki yamai dang amshitsü. Ibai taküm küm (2018) nungi School nung azüngtsü Textbook kar nungbo enokatokogo.
A. Zonizüng Nüngja Ratet : Asen tsüraburi Ita Anü dang “Zoni” ta aja aser ibaji lemsaa züngdangba agi ZONIZÜNG (Calendar) ta jatetogo. Yangji keta aliba teratet tongmelang agi yamai agütsür:
1. AENJETI (January): Küm nung mezüngbuba ita, tetezü akhi asen tsürabur mapang iba ita nung küm piyong atema tagitarutsü aser tachi-tajemtsü bushia bendang ter sema aenlen jajaba mapang, talisa tzümalen ramen memenatsü atema iba ita nung tetsübu kecha makai aenlen jajaba ita asüba agi “Aenjeti” ta ajar.
2. TSÜKLAI (February): Iba ita nungi alu achiba apa manung mi-ronü mesüra mi jangrur amai apa tema nung tanela angutsü aser anüngdangbo tera lemyia, apashia mesüra tsüngsarusaa tsüka akümer anungji “Tsüklai” ta ajar.
3. Metsüremi (March): Iba ita dang aluyimertemi metsü ita ta jaa metsü tapu teimbaka ali nung aremer mesüra tsünür, anungji “Metsüremi” ta ajar.
4. Rongchii (April): Iba ita nung aluyimertemi kümbok, ohja, atsüng aser leptsü amala leptoker ayuba terong nungi lanu adoka aliba koba dang “Rong” ta ajar ibai chia inyaker iba jagi “Rongchii” ta ajar.
5. Monupii (May): Iba ita tetenzük (1-3) nung Moatsü amungtsü aser iba moatsü temli alu (Pen/Maipu) nung mo tila adoka aliba koba dang Monu ta ajar ibaji alulem agi pia tenzüker iba jagi “Monupii” ta ajar.
6. Aami (June): Iba ita nung tzünglu sashia arua ali kanga tayi akümer aser süngdonglidong ajak nung tu ka dang adoker saka iba ita nung Aamdong ka nung tu ana adoker iba jagi “Aami” ta ajar.
7. Chiteni (July): Iba ita nung aluyimeri tsünüsempongba teimbaka nungi süngjanglijang onga chia tenzüker anungji “Chiteni” ta ajar.
8. Luroi (August): Iba ita nung aluyimertem alu aror anungji “Luroi” ta ajar.
9. Rongjui (September): Iba ita ayongtem nung tzü ajema akümdang ango aputsü rongju yanglua ango apur anungji iba ita dang “Rongjui” ta ajar.
10. Mongputeni (October): Küm shia iba ita nungi tenzüka mongpu (Tsüngküm) tenzüker iba jagi “Mongputeni” ta ajar.
11. Yimpoksüi (November): Akhidang asen tetsü tebou süchiba mapang alu roa renemkonemer tsüngküm tenzüka aodang shirnoki Süchitsü atemzüka ali parnoki iba ita nung sü chia yimer yimkong tepok süngdakja peletepdaktsür anungji “Yimpoksüi” ta ajar.
12. Luchii (December): Yimpoksüi (Nov) nung alu tasen achitsü repranga alu süa yur iba ita nung alu achir iba jagi “Luchii” ta ajar.
B. Hopta ka nung anogo Tenet Ratet:
1. Amungnü (Sunday): Anogo troknü mazüngi pei mapa inyaka lir mungzükba anogoasüba agi Amungnü ta ajar.
2. Tentonü (Monday): Iba anogo akialu aser wadang balalai aotsü asoshi ratamataa, pezübelema aser tentotenraa dang ayamesoteter asüba agi Tentonü ta ajar.
3. Sangtennü (Tuesday): Maparen ajak tenzüka toker teinyakto wadang nung mulung Sangwasangwa aser jangrabangraa maparen ajak tenzüka aoba agi Sangtennü ta ajar.
4. Rasemnü (Wednesday): Maparen ajak nung bendenloka, raloka, awaloka aser rasemraloka inyaksangshiba agi Rasemnü ta ajar.
5. Yangtepnü (Thursday): Maparen aser wadang balala nung purmedemer den yaritepa/küpzüktepa inyakba agi Yangtepnü ta ajar.
6. Rogonü (Friday): Iba anogo nung timtemer mesüra maparen balala nung tesüpur yarisema inyaktsür ibajagi Rogonü ta ajar.
7. Küptoknü (Saturday): Purmedemeri asen timtema alidang ajungba/yariba asenia meyipa agütsüba anogo asüba agi Küptoknü ta ajar.

Temetettsü:
1. Ita nüngja tatem ajak nung “i” agi tema angutsü koba tetezü “Ita” ta asüba tamaitsü alitsü. Tatishitsü agi “AENJET”= aenlen jajaba aser “I” = Ita ta angatetdi, iba tetezü “aenlen jajaba ita”.
2. Class Ka nungi BA level tashi nung Textbook kar nung ita aser hopta anogo nüngja enoka meliaka akokba tashi Aor kaketrijusanger ajaki teküratiba nung ibai angazükjemtsü atema Ao subject tesayur ajaki ibai General Knowledge ama (Textbook nung meliaka) tatidang tasüngdangbatem nung enoksema asüngdangtsü ajungshir.

Sd/-
I. Temjen Tzüdir
Secretary, ASLB.