ASM-i ketdangsüa National Highway yanglushitsü

CTN. August 05 (TYO): Changtongya aser Longleng na tsüngda National Highway lenmang nung nisungtem timatemba aser takoksa ajuruba repranga meliteti tanü Honibar nü Akhoya Senso Mongdangi Akhoya sensosanger ajak yimkong nübodok sentong ka ayongzüka lenmang yanglushija mongogo.
Changtongya-Longleng lenmang tetenzüklen Akhoya nunger lushi kilometre 7 nung ASM-i lenmang yanglushitsüba mapa ya inyaka liasü.
Honibar nü yim nübodoka angati National Highway nübortemi inyakja alidang, nisung kari truck gari ka nung lenmang yanglur company-i ayuba hume pipe kar bener ooya lia apu aser parnok rongnung kabo PWD(NH) nung ketdangser ka liasü ta Akhoya nunger tatartemi metetdaktsü. Item hume pipe-ji yimteni sota lir ta parnokisa metetdaktsü.
“Longleng lenmang nung lenmang yanglur company-i ayuba osettem teti samar aser itemji tangari yimertem dak temulung melemi tongloktsür,”ta tatartemisa metetdaktsü.
Parnokisa metetdaktsüba agi, Lasong ayong temdangba apu tashimait kümdagi, anungji mashi mapang nung lendong ataloktsü amai lir .
Tanü Changtongya-Longleng National Highway inyakba mapang, PWD (NH) kübok lenmang anepalura mali ama, lenmang tezü anatsülen nungi ayi aser süngdong meyiba agi lenmanga mesademi kümer liasü ta ASM lenirtemi metetdaktsu.
Tanü iba yim nübodok sentong nung excavator gari ana, truck gari 5 den nübo noklang aikati tenla agüja inyakogo ta parnokisa ashi.
ASM tenzüker küm 50 ajungba Golden Jubilee tenüng nung tanü iba yimkong nübodok sentong ya ayongzüka liasü.
Yimkong nübodoka National Highway yanglushitsüba sentong takok ngua inyaktsüsa nübo, rongsen aser ali atuba aser abenba gari tenla agütsürtem ajak dang kanga pelar ta ASM tir Wb.I.Rendikabai metetdak-tsüogo.