Aso 21 buba madak kibur

Yakanü America nung oagi India ato kilonser Narendra  Modii tanü alima aso 21 buba yabo India meyong ta sangoktsübaji India nunger ajak asoshi tayongzükba tuluka asütsü. Atangji, alima aso mesüra putu shia kintem madak alakteta alima kin kari yimsü asür. Aji oda, Yisu Khrista mapang Rome nungertemi yimsü asüba ama, putu ka British nungertemi yimsü süogo aser tang ya taoba aso tom ka nungi US-i yimsü asüba mapang lir. Atangji, akhidang alima kintem madak yimsü asüba o tanü yimsü asüba maparen na balala, kechiyong akhidangbo raraba nok nü bener alima makyonga ao aser tangar lima aser yimtenji atsüngdoker yimsü asü. Ajisüaka, tanü alima kati alima kintem madak ramoka yimsü asübaji tangar pei lima nung yimsüsüa aliba atsüngdoker yimsü asütsübaji masü saka tashitemetet aser rongsen nung tokteptsü aser shir temetetba aser takarba südir pari yimsü asütsü. Aji oda, nok nü bener alima makyonga mouaka aser matsüngtetaka, taoba alima aso tom ka nungi tang tashi China nungertemi yimsü asür amato kümogo, kechiyong tangbo England  aser America tashi nung China nungertemi China nung yangluba electronics osettem nungi shir chiyongtsü aser tanur kazütsü osettem agi alima süngogo. Aji oda, ano külen alima tashitemetet aser rongsen  peria alinungji, iba tashitemetet jagi alima kümzüka yutettsüsa raraba oset kechisarina yangluteta yur alima tesem kongsa parnok teyari nüngdaker, iba tesemji tonga oagi yarir aser aküm agüja anüker. Tanü putu nung ya US nunger mali asübo alima tesem aika nung telok tilaba mesüra kin tilaba purtem aika alar tia nung reshikangshia lila mesüra samar lila. Aji oda, tanü putu nung America nunger ya alima kintem aika asoshi tekümzüker kin amai kümogo. Iba amaji tanü putu nung alima kintem madak India kibur akümtsü asoshi India nungertemi kanga meranga inyaktsüla. Pi British nunger, China nunger aser America nungertemi alima kintem madak kibur asütsüsa inyaktetbaji pei tetsü taso lima asoshi tasüa majem pei taküm bendanga agüja inyakba agi lir, parnoki pei tetsü tasoli ashiokja ochimashi mapa meinyaker. Talisa item limatem nung yimten yimsüsürtemji nübortemi temulung malem bilemtsüla nisungtem masü. Parnoki pei yimten aser nübortem meyong shilem chitsütsübajibo kenyongi bilema mali saka nübortem anisüngzüka yutsütsü aser pei limaji pi limatem dang nungi temaba jenjang nung ayutsü bilema teti shisadanger aser taküm ajak bendanga agüja  inyaker. Atangji, Narendra Modii anir British aser  America nunger ama pei lima meimba shisatsü dener karbo alitsü, ajisüaka India nung yimsüsürtemi anir pei lima asoshi taküm ajak bendanga agüja ochishia meinyakra, alima ajaklen Narendra Modii alima aso 21 bubabo India meyong asütsü ta ayimtenbaji amajok asütsü. Alima aso 21 buba ya India meyong asütsü asoshi Narendra Modii India nung nüngdakba oset ajak India nung yanglutsü asoshi ozüng agütsüogo. Ibayongji, tanü tangalen yangluba osettsüsettem India-i bener meyoktetter. Iba sentongji junger aser India nungertemi yamaji inyaktsüla. Ajisüaka, tarendaktsü kaji India nung yangluba oset aser chiyongtsütemji shitak mesüra India nung dena meyoktettsü. Alima aso 21 buba ya India meyong asütsü atema tangar limatemi India akümtsübutsüsa rongsen aser nübo agi tangar limatem yaritettsüla aser India nung yangluba osettem agi alima asüngtsüla. Aji oda, India ya nütsüng aika aser item rongnung lanurtem agi sünga aliba lima asünungji mapa inyaktsü asoshi nübo agi manünger. Ano, tanü putu nung alima madak India kibur amato asütsüsa India nunger lanurtem ajaki nüngdakba langkakabosa inyak mesüra yanglu ashitsüla. Kin ka anema alitsübaji lanurtem dak tuluka keta lir, anungji item lanurtemji anema lia mapa tapu balala inyak sayutsüla. Item ajakji mapa küma inyaktettsü atema nübortem longjema alitsüla aser nübortem longjema alitsü asoshi tamangba yimsü aser sobaliba ajak kasasa akümtsübua amshitsüla aser kin tilaba tuluba kecha mali, ajak senso tajung kaka, anungji kasasa temeten aser khuret lir ta senso ajaki bilema inyaktsüsa yimsü asütsüla.