Assad-i Palmyra tanaben yanglushitsü atema UN teyari meshir

Beirut, March 30 (Agencies): Syria anülulentip tsütsülen tentetba Palmyra yimti tanaben yanglushitsü maparen nung par Syria yaritsü asoshi Syria Tir, Bashar al-Assad-i United Nations (UN) densema, alima jenjang nung tentetba tentet balala den onük benokba osang ka Syria sorkari ketdang asüba SANA osangi tanü, Bodbar nü metetdaktsüogo.

UN-i UNESCO world heritage tesem ta züngokba Palmyra nungi Islamic State (IS) kiralongrar telok makdokba maparen pela agizükba atema pelaba olen ka lemsatepba den külemi, kasa yimti tanaben yanglushitsü maparen nung par Syria yaritsü asoshi Assad-i UN Secretary General, Ban Ki-moon den tezüluba nung onük benok ta osangi shisem.

Syria sorkar mitkartemi Palmyra yimti IS ket nungi taoba Deobar nü tanaben agishiba osang jangjaogo.

IS teloki Palmyra yimti yaküm May ita tashiyim agi agiba sülen idakji Rom yimli mapang yangluba ki o jen aika pokshiba oset amashia poksatsüba osanga bushiteta lir.

Par Syria-i kiralongrar anema raratsü atema ajak den amaliteptsü renema aliba olen ka Assad-i kasa shity ajanga metetdakja liasü.

Russia mitkartemi nungitba Syria mitkartemi Palmyra yimti tanaben agishiba sülen maneni Palmyra anüdoklen aser anülulentip tsütsülen tentetba jila ana tashi IS ket nungi agiba osanga jangjaogo.