Assad-i Tir menden toktsüba ajanga dang Syria ken o bentettettsü: Obama

Manila, November 19 (Agencies): Syria Tir, Bashar al-Assad-i Syria Tir menden toktsüba ajanga dang küm 5 shi tejaklen nungi tenzüka Syria nung adokba mangatettepbaren bentettettsü ta US Tir, Barack Obama-i tanü Brehostibar nü sangoktsüogo.

“Assad-i Syria lenisütsü menden aben tashibo par linüki ajurushia aliba mangatettep ken o bentettettsüsa jenjang mangur,” ta Philippines kübok Manila nung ayongba CEO Summit senden nung shilem agisang, Obama-i ashi.

Assad-i Syria lenisütsü menden metoktsüba ajanga par linük nung yimji yimjung tia bener arutsü maparen nem tang tetsükdakba tulu bener arutsüba den külemi, Syria linük pusema nungitba Russia o Iran linük na aser West na tsüngda Syria ken o nung tangatetba tajung kati maruteti lir.

Obama-i Russia Tir, Vladimir Putin den ajurutepa Syria den sentakba onük benoka senden mener anogo ishika lir külen tanü iba osang ya sangoktsür lir.

Ano külen, “Assad Syria Tir menden maneni bendaktsütsü mesüra pa Tir menden nungi atsüngdoktsü tashiji Syria nübur ket kija nung lir,” ta Russia Foreign Minister, Sergei Lavrov-ia yashi, Bodbar nü metetdaktsüogo.

Ajisüaka, “Assad-i aniba Syria sorkari taochi mesayui tai maketba nübur jenti tepsetogo,” ta shia, Syria nüburtemi Assad nem maneni linük lenisütsü menden abentsü temeten magütsütsü ta Obama-i metetdaktsü.

“West-i Russia aser Iran na den sema, West-i Assad nem Syria lenisütsü menden maneni bendaktsütsü lemtet aka, Syria nübur timbakati iba telemtetbaji kodanga magizüktsü,” ta pai ashi.

Islamic State (IS) ta ajaba kiralongrar teloki Syria aser Iraq na indang lushi shilem tuluba ka tashiyim agi agia lendong kanga sashia atalokdaktsüba ajanga Syria ken o tekaraba mapang nung bentettsütsüji tang rongdaka kümogo.

IS teloki tawa Paris aser Beirut na nung lendong kanga sashia atalokdaktsüba den külemi, Egypt kübok Sinai peninsula nung Russia’er tayimtsü tsükokdaktsüba maparena par telokisa inyakba kuli bushiteta lir.