Assam 2021: Congress-i anir telok balalai candidate tem aniener

Guwahati, April 9 (Agencies): Assam assembly election nung vote enoktsüba tembangogo saka political party tem tsüngda sen yong candidate alizüktepba tsübuteper.
Assam nung Congress-i aniba Grand Alliance-i taruba sorkar akümtsü temolung alemer saka parnok lennirtemi pei pei candidate dak temolung melemteter.
BJP aser parnok den yaritepba teloktemi tanga party tem nungi candidate tem mesüzüka alizükba tsübuba agi Grand Alliance nung adenertem- Congress, AIUDF aser BPF teloktemi parnok candidate tem Assam adena anir aotsü sentong lir.
Hokolbarnü Congress-i candidate 20 tashi Rajasthan-i anir ogo aser AIUDF candidate 22 tashi Assam toktsür ogo ta osang angazüker.
Congress aser AIUDF-i parnok indang candidate tem Jaipur nung aliba Hotel Fairmont nung mongdaktsütsü. Assam nung election result madok tashi parnok state nungi pilar ayutsü ta osang ajanga ashi.
Iba mapang candidate shia nem mobile phone balaka agütsütsü.
Hagrama Mahilary-i aniba BPF candidate ka danga state adena anir mao lir saka parnok ajak tanü nikongdang Kokrajhar nung adenshitsü jatepogo.
May 2, 2021 nü Assembly election indang votes azüngtsü saka Assam nung opposition teloktemi parnok candidate tem BJP-i mesüzüka anir aotsü tsübur.
“BJP-i election nung tamakok anguba sülen Congress candidate tem mesüzüka anir aobaji yimya ka ama kümogo. Anungji parnoki (teyariteper teloktem) kümdanga linür” ta Congress lennir Randeep Singh Surjewala-i ashi.
“Yangi arurtem ajak onoki anepalutsü. Onoki parnok koba party nungi aru aser kechi atema aru’ar memetet. Nisung 20 shi ka arua lir.
Congress-i parnok amongba nung sen endokba ajak menoktsü. Centre nung BJP ali tashi MLA tem alizükba maparen inyaktsü” ta Rajasthan Assembly nung Congress indang chief whip, Mahesh Joshi-ia metetdaktsü.
“Onoki Assam nunger dang Chhattisgarh nung onok nem takok tulu ngudaktsüba ama maongka agütsütsü ayongzüker. Yamaji asü nung dang BJP mesüra tangar shingaia candidate tem mesüzüka anir moutettsü. Onoki menden 101 aginür” ta Congress national general secretary, Randeep Singh Sujerwala-i nüboyimba mapang ashi.
“Democracy linük ka nung nübortem vote enoktsüba akhümtsübutsüla. Ajisüaka, nübori shimtetba sorkar ka loksaktsütsü merangbaji magizüker” ta paisa metetdaktsüogo.
Külen, Assam Pradesh Congress Committee (APCC) president Ripun Bora-i taküm assembly election nung Congress-i aniba teloktepi menden 90 tema nung takok angutsü imlar ta shiogo.