Assam AIUDF MLA kati tetsür ka tashiyim agi raksatsü

Guwahati, Chiteni/July 7 (Agencies): Küptoknü kibong kümer aliba tetsür kati All India United Democratic Front (AIUDF) MLA, Nizam Uddin Choudhury-i Hailakandi district circuit house nung la tashiyim agi raksatsü ta aitsüogo.
Arishi küm 45 tain Choudhury ya Southern Assam, Barak Valley kübok Algapur constituency nungi MLA lir.
Hailakandi Sadar police station, Officer-in-Charge, Surajit Choudhury-i ashiba agi, kibong kümer aliba tetsür kati Algapur MLA-i la tashiyim agi raksatsü, ta aija ken o ka benokogo. “FIR agizükba sülen onoki ken o (no – 529/2018) ka benokogo aser bushisüngdang tenzükogo,” ta pai ashi.
Tetsürla yagisa ashiba agi, iba ken o agintsü asoshi aija alisang yagi la nem sen lakh 5 agütsü.
Laisa maneni la kinungbu anema ken o ka benokogo, shibai la dak tashiyim inyakaba nung teyari agüja liasü.
Tetsürla yagi ashiba agi, Monupi/May nung lar kidang anaben aser Hailakandi circuit house nung khen ta la dak tashi inyaka liasü. FIR nung lai, la ya kinungbui circuit house-i anir ao ta shia lir, aser iba sülen la kidang shibanga ayu, ajisüaka la jentet aser police nem iba ken o agütsü. “Ni ochi temeden aginer. Ochi temeden mongura ni soseta asütsü,” ta tetsürla yagi ashi.
Kasa mapang nung Choudhury-i, iba ken o ya teyazü aser pa anemertem pa anema inyakba maparen ka lir ta shiogo.
“Tetsürla kinungbu yagi ozü tanurtem private tuition agir aser iba ajanga ni pa den metettepa aküm. Tena ya ita asem tejakdang kibong aküm saka teti rarabangsen adokba ajanga kinungbu ya kidang memejangi liasü. Tawa pa ozü kidang anogo ishika liogo. Anungji lai kinungbu dak mang ayangtsü mechi iba otsü ya yanglua ni aitsüogo. Iba ken o ya shidak asünungbo la ita paika ya matala,” ta MLA-i ashi.