Assam ajunga AFSPA kübok ‘disturbed’ area ta sangdongogo

New Delhi, August 7 (Agencies): Centre-i ita ka atema Assam ajunga “disturbed” area ta sangdongogo. ULFA, NDFB aser tanga telungpur teloktemi ozüng alema mapa inyakba nung ajemdaker Armed Forces (Special Powers) Act (AFSPA) kübok “disturbed” area indang osang metetdaktsü.
Union home ministry-isa Assam den arrtsüa aliba Meghalaya kübok tesemtem aser Arunachal Pradesh nung district 3 “disturbed” area ta sangdongogo. Iba ya August 3, 2017 nungi tenzüker ita asem atema mapang apuloktsü.
Home ministry-i sangdong balala nung August 1 nungi 31, 2017 tashi Assam ajunga “disturbed” ta metetdaktsü.
Tanga sangdong ka nung ministry-isa August 3 nungi September 30, 2017 tashi Assam den arrtsüa aliba Meghalaya kübok kilometre 20 telongtet nung AFSPA kübok “disturbed area” alitsü metetdaktsü.
Arunachal Pradesh kübok Tirap, Changlang aser Longding district tem aser tanga district 14 nung police stations 14 telongtet nung AFSPA kübok August 4 nungi September 30, 2017 tashi “disturbed” ta ministry-isa metetdaktsü.
Arunachal Pradesh nung police station 14 ji Papumpare, West Siang, East Siang, Lower Dibang Valley, East Kameng, West Kameng, Namsai, Lohit district aser Lower Subansiri district tem nung lir.
2016 küm Assam nung ozüng alema inyakba tatalokba 75 liasü aser iba nung sepaitem dena nisung 33 taküm sama aser 14 apu, ta home ministry ketdangser kati ashi.
Ozüng alema mapa inyakbaji ULFA, NDFB aser tanga telungpur teloktemi inyakba liasü, ta paisa shisem.
November 1990 nungi Assam nung AFSPA benoka liasü.
Arunachal Pradesh nung NSCN(IM), NSCN(K), ULFA, NDFB aser tanga teloktemi ozüng alema mapa inyakba atema AFSPA magiener, ta ketdangserisa metetdaktsü.
Arunachal Pradesh kübok district asem- Tirap, Changlang aser Longding nung January 2016 nungi AFSPA benoka liasü.
Meghalaya nunga tawa tu ULFA, NDFB telungpurtemi ozüng alema mapa inyakogo.

ULFA telungpurtemi I-Day nung amaktsü akok
Guwahati, August 7 (Agencies): ULFA telungpurtemi Independence Day nung amaktsü akok ta osang lazükba sülen Assam ajungalen kümdanga alitsü tetuyuba ka agütsüogo.
Myanmar nung telungpur 7 Assam-i miima aitogo aser parnoki amaktsü akok ta intelligence osang ka ajanga metetdaktsü.
Telungpurtemji Assam-Arunachal Pradesh arrtsülen lir aser parnoki amaktsü atema tetuyuba ka atar. Iba osang angazükba sülen security akangshiogo aser telungpurtem aputsü atema mapa tenzükogo, ta osang ajangasa shisem.
Telungpurtem jagi telok alidak amaktsü tasa lir aser parnoki telok adenshiba tesemtem nung bomb yutsütsü atema teyaritepertem bushir, ta intelligence osangisa metetdaktsü.
Iba osang angazükba sülen security forces indang Unified Command-i mapa inyaktsü tenzükogo. Telungur teloktemi Assam nung mapa tamajung meinyakdaktsütsü atema mapa inyakdar, ta ketdangsertemi ashi.