Assam ajunga nung kümdangshia alitsü asoshi metetdaktsü

Guwahati, March 9 (Agencies): Dhemaji district, All Assam Students Union (AASU) office amakba sülen, iba amala timtem tarutsü nung mataloktsü asoshi Assam police-i Brehostibarnü state ajunga nung kümdangshia alitsü asoshi metetdaktsüogo. Iba tatalokba bushisüngdangtsü asoshi ‘special investigating team’ (SIT) ka amenlokogo. “Onoki state ajunga nung yamala timtem matokdaktsütsü asoshi kümdangshia alitsü atema metetdaktsüogo, aser yamala timtem tarutsü nung matalokdaktsütsü asoshi onoki molungtetogo. Nüngdak süra onoki tashiyim amshitsü,” ta Assam Police, Director General, Mukesh Sahay-i Guwahati nung osangbenertem dang ashi.
March 6 nü AASU office amakba ya, Nikhil Bharat Bengali Udbastu Samanvay Samiti (NBBUSS) puri anir tenzük. AASU office amakba sülen AASU aser Asom Jatiyatabadi Yuva Chatra Parishad-i anir state nung tesem aika nung longkak aitba sentong ayongzüka agi.
Special investigating team (SIT) ya CID, Police Superintendent, Raja Martandan tekolak ser shima lir. Parnoki iba tatalokba bushisüngdangtsü. Nisung kari danga aibelena lira ozüngi melaba ama merenshitsü, ta pai ashi.
“Onoki iba tatalokba nung kecha tebendanga melii bushisüngdangtsü, talisa NBBUSS pur Silapathar nung senden amenba, koba ajanga timtem atalok, iba senden indang osang tali temolung agüja bushitsü,” ta Sahay-i ashi.
AASU office amenloker alidak, Silapathar-i, Assam Police battalion, company 14 den constable 80 talila yokogo. Iba den külemi ‘paramilitary’ company kar Jorhat aser North Lakhimpur nung Silapathar-i belener ogo.
“District ajak nung Deputy commissioner tem dang NBBUSS pur senden aser sentongtem ajak magidaktsütsü asoshi tetuyuba agütsüogo,” ta Sahay-i ashi.
Chief Minister Sarbananda Sonowal-i iba tatalokba dak sendakba nung bushisüngdangtsü asoshi Additional Chief Secretary V B Pyarelal nem tetuyuba agütsüba sangdongogo. Pa dang tan ita tsüngda osang agütsütsü asoshi metetdaktsü. NBBUSS nung züngsemtem aser pusemertemi March 6 nü Silapathar nung Bangladesh nungi arur Hindu nunger atema, India lisopur jenjang agütsütsü asoshi khanga sentong ka achaayanga kaogo.
Iba senden tembangba sülen parnoki yimdong süa sentong ka tenzük, aser NH15(B) nung aliba AASU office amak. Parnoki office telung nung aliba osettem raksatsü, aser kaketshir union nung inyaker parnok asem yirutsü.